Ynne ka sngi u Chief Minister ka jylla, u Conrad Sangma da wan wai pyrda u yei lehkmen dap 50 snem namo ka Golden Jubilee Celebration ka Amlarem Civil Sub-Division.
Ha kani ka sngi da emlang u Montri ka chnat Education, uwa man leh u MLA ka Amlarem u Lahkmen Rymbui, u Montri ka GAD wa C&RD, u Sosthenes Sohtun, u DC ka West Jaiñtia Hills, u Abhinav Kumar Singh, u SP ka District, u JS Dhonoa, ki MDC, ki Dolloi, ki heh sorkar wa kiwi kiwi.
Kam u kongsan ha kani ka sngi u Conrad Sangma da ong u wa ka sorkar da chimkhia wei sñiawkhia ko wow pyntikna wa i chakri u man iwa paka wei iwa yajan bha wa ki paidbah khnang wym emkaam de ki wow lai cha jngai hawa leh ki ya ki kot ki sla yong ki kamjooh wa kiwi ki kaam.
Da pynbna u wa daw chna noh ya ka Mini Secretariat ha Amlarem heiwa i kreh daw sdang i hapoh uni u snem wei u pyrchang wow sdang pyn hapyrdi ini i lehkmen dap 50 snem ka Amlarem Sub-Division.
U Conrad da pynbna u leh heiyatoh wa ka Umkor heiwa da emkaam sa Rs. 16 Klur kamtæ da pynbna u wow pynlait noh ya ka poisa ka Amlarem Augmentation Water Supply khnang wa i kreh leh u sdang noh i.
Sa kawi won ka Project wa emkaam wa pynbna u Conrad ynne toh ki sarok pohchnong namo ka Internal Road ha Amlarem Sub-Division heiwa i kreh leh u sdang i hapoh uni u snem.
Heijooh i por da khana u wa kwah u wow yoo wa ha ki sngi wow wan, kat iwa em i emkaam ki paidbah ymtoh de u lai ki palat bar ya ka Block Office wow ye leh yeiwa emkaam ki heiwa ym emkaam de ki u lai luti jngai nadooh wa yaleh ya ka Tribal Certificate wa kiwi kiwi.
Neiliang u Lahkmen Rymbui da khana u wa kini ki kaam pynroi wa pynbna u Conrad ynne hapoh ka Amlarem Civil Sub-Division u kynjoh ki ya palat Rs. 50 Klur.
Discussion about this post