Ka yung krehkaam u Deputy Commissioner lyngba ka District Mission Management Unit, deilang ka National Rural Livelihood Mission (NRLM) dei ya krehlang waroh ki chnat kreh kaam waphær waphær wa em hapoh ka West Jaintia Hills District daw pynman ya ka “3rd District Buyers and Sellers Meet Cum SHG Mela 2025” namo ka yaaw yadai yathied deilang i yachemlang waroh ki SHG kiwa em hapoh ka District.
Ya kani ka yaaw u pynman ha ka 05-12-25 wa ha ka 06-12-25 ha madan Jrisaleiñ, Chutwakhu, Jowai.
Ha kitai ki ar sngi daw em chiboon ki jait mar kam ki tiar ki tar wa chna dei kti, ki kaam chna dur, ki tiar ki tar tynre, i rwai i tem wa harukom, i pynyooriam waphær waphær, ki baam ki dih tynre wa boonjait wa kiwi kiwi.
Daw em leh ka Job Fair wa pynman ka MSSDS, kawa man ka laad yoh khih yoh kreh kyrpang neibynta ki khon khynroo ka District wei daw em leh ki thaw wow yarap wow yaleh Aadhaar wei kamjooh ki thaw wow pynche neibynta ka e-KYC wei wow leh Registration.
Kiwa tem wa put ha ka 5 tarik u December kynthup ki ya ki Rebel Riffs, ki Ria Sharak wa kiwa rwai wa tem ka CM Meghalaya Grassroots Music Programme. Ha ka 6 tarik u December won daw wan tem ki Magnificent Obsession, ki Ashes of the Fall deilang kiwa napoh ka CM Meghalaya Grassroots Music Programme wei daw pynkut da ka DJ Night wow chimbynta da ki DJ wa pawnaam ka jylla.
Kamtæ da kyrpaad ya kiwa chong chnong chynrang wa kynthai wow yawan cha kani ka “3rd District Buyer and Sellers Meet cum SHG Mela 2025” wei i wan yong phi daw e bor e mynsein ko ya warohlang yow man kani ka yaaw yadai yathied kawa jop.
Discussion about this post