Deilang wa ar tylli ki Takma liwan ka Sawakani Lakiang naka Mr & Mrs India

Ka Sawakani Lakiang da liwan yung ko deilang wa i Tamka Rupa wa i Takma Tama deiwa yoh wa ar ha ka kyrdan Women’s Sport Model wei da yoh wa le ko haka Bikini ha ka yakob pynyoo doh ksah kawa tip kam ka Mr & Mrs India kawa da pynman ha Jaipur, Rajasthan nadooh ka 15 hadooh ka 17 tarik uni u bnai kawa man leh kam chibynta ka 11^th National Bodybuilding & Fitness Championship 2023.

I chnong tre ka Sawakani toh na Tpep-Pale wei katni da sah ko ha Khimusniang wei ynne i janmiet chwa u psiah ko chapoh ka chnong Jowai, da wan wow pdiang burom yaka da ki dkhot ka Bouncer Association of Meghalaya (BAM), Jaiñtia Hills deiwa emlang leh ki kiwa ha-yung ha-sem ko wa ki lok ki jor.

Hawa yoh u yaklam waka Sawakani da e khublei ko ya waroh kitu kiwa synraan lang ya ka hadooh wa poi cha Rajasthan hadooh wa yoh ki yei jop heiwa da em 6 ngut napoh ka jylla heiwa 4 ngut toh ki chynrang wa 2 ngut ki kynthai.

Da e khublei ko leh ya u MLA ka Jowai, u Wailadmiki Shylla uwa da e yei kyrchaan kamjooh ya u DC ka District wa kiwa ha-yung ha-sem, ka Balang Catholic, ka seiñ khynroo ka Dorbar Chnong Khimusniang wa kiwi de.

District Cricket League: Psiah Final ka Mowkaiaw

May 15, 2025

District Cricket League: Jop ka Young Lad’s ya ka Phramer

May 13, 2025

Da khana ko wa da em ko ha ini i kaam Body Building dang du chi snem tam donhi wei kani ka yakob kattæ toh ka sien nyngkong wa lai chimbynta ko ha ka kyrdan ka ri wei da sdang chwa ko napoh ka jylla ynnin u snem neitæ cha ka North East India.

Chooh chooh da ong ko leh wa ka Gym wa lai ko yow pynkhreh toh kawa em ha Panaliar, Jowai kawa tip kam ka Body Mass Gym.

Da e ko leh yei pynchlur mynsien cha kiwi ki kynthai wym toh u murieh ya iwon iwon i sap wei wym toh u sarom neibhah wa da e da u Blai wei wym toh leh u ap yeiwa ong ki bru wa klam beiñ tangwa wow lai bait chahmat.

Ka bei ka Sawakani, ka Irena Mary Lakiang da pynsñiaw ko yei kmen wa ka khon yong ka em mynsien ko wow chimbynta ha kini ki kaam wei da pynchlur ko ka nadooh wa sdang.

Ka Sawakani toh kawa dang dep dap 20 snem wei lai puræ BA 1^st Semester ko ha Kiang Nangbah College.

Hadien ini i pdiang burom, neiliang ki dkhot ka BAM da pynkhreh ki da ka kari yow kit kyrpang yaka Sawakani deiwa lai luti na Iawmusiang hadooh wa poi cha yung ko.