Ka Greta Solution Training Academy, Jowai deiwa kyrchaan ka sorkar Meghalaya lyngba ka Meghalaya State Skills Development Society (MSSDS), Shillong ryngkat i krehlang wa ka Skill Development Cell ka Kiang Nangbah Government College Jowai, ha ka 16 tarik uni u bnai da yoh ki wow pynman ya ka pynkup burom ya kiwa da pyndep yei chah sikai namo ka Felicitation Programme ha Multi-purpose Hall ka Kiang Nangbah Govt’s College Jowai.
Ya kani ka yalang da pynlai da u Sonjoy Shylla, Centre Head yong ka Greta Solution Training Academy, Jowai.
Ha kani ka sngi da embynta lang ka Dr. E.M Blah, Principal ka Kiang Nangbah Govt College kam ka kongsan ryngkat wa u Skill Development Officer, West Jaiñtia Hills District u Lambormi Suchen.
U Lambormi Suchen hawa klam hajrong ka Skill Meghalaya Project yong ka sorkar wei i myntoi lyngba ki e sikai waphær waphær neibynta ki khon khynroo, da ong u i thmu toh wow yarap seiñ kreh wei kamjooh wow yoh kreh ha ki Fast-Food, ki Restaurant wa Hotel manda dep pynpliah ki lyngba kani ka Skill Training.
Hajrong ini, ka Principal ka Kiang Nangbah Govt’s College da pynchlur ko ya ki khon khynroo wow kreh chitom wei ymtoh wow sñiawpoh ya iwon iwon i jait kreh wa kreh wot ha i puræ puthi leh toh wow e deiwa bha tam khnang wow man kiwa jop.
Da yoh leh ya ka khubor wa jop ini i e sikai na ka Hestis Phawa wa ka Russian Melodies Lamare, kiwa da pyndep ya kani ka e sikai wa 3 bnai kiwa da yaroh ya ka Greta Solution Training Academy lyngba i yarap e kreh (Job Placement). Chooh chooh da e mynsien ya kiwi tawon ki khynnah wow kreh chitom ki katwa dang em hapoh i chah sikai khnang wow yoh ki ya u soh i jop.
Ha kani ka Felicitation Programme lyngba ka Third Party Assessment da yoh wow saam ya ki Certificate wa ki tiar Start-up Tools cha waroh ki 48 ngut kiwa da dep chah hikai. Ki tiar sdang kreh namo ki Start-up Tools wa da saam kynthup ki ya ki kharai sdieh chow, ki Tawa, ki Gas Cylinder, ki Gas Stove, ki tiar wow pynjær um (Strainer), ki pliang, ki proh wa kiwi kiwi.
Da pynkut ya ka yalang da ki kyntien khublei na kawa sikai ka Greta Training Academy, ka Evie Cordia Lamare.
