Ki khon khynroo khyllood wa da pyndep yei chah sikai chet baam wa tip kam ka Street Food Vendor-Standalone wa da leh da ka Creta Solutions Training Academy deiwa kyrchaan poisa da ka Meghalaya Skill Development Society chirup deiwa ya krehlang waka Kiang Nangbah Govt College Jowai, ynne ka sngi da yoh pdiang Certificate ki deilang wa ki tiar chet wa kyntup ya ka Stove chirup wa u kum Gas wa khian kam ka dak wa nadooh kani ka sngi kini kiwa da pyndep yei chah sikai u sdang noh yei kaam deiwa yieñ hei yong ki hi ki kjat.
Kini kiwa da pyndep yei chah sikai da em ki 52 ngut wei i chah sikai ki toh le bnai deiwa khlem su iwon iwon.
Ha ka yalang wa pynlai da u Sonjoy Shylla, Centre Head Jowai ha Kiang Nangbah College Auditorium da emlang u MLA ka Jowai, u Wailadmiki Shylla, ka D.V. Lyngdoh, MCS, Addl Deputy Commissioner West Jaiñtia Hills, ka Principal ka Kiang Nangbah Govt. College, ka Dr. EM Blah, u Dasan Warlaithma, Coordinator ka Creta Solutions Training Academy, u Lambormi Suchen, Skill Development Officer, West Jaiñtia Hills District, u Golden Dkhar, Skill Incharge Kiang Nangbah Govt College wa kiwi.
U kongsan yong kani ka sngi u Wailadmiki Shylla da kyntu u ya kini ki khynroo khyllood wym toh u pynsepai ki yei sikai wa da yoh ki kamjooh ki tiar wa ka sorkar da e ko ha ki. Neibhah lada em kiwa pynsepai kitæ da man ki kam kiwa khanglaad ya kitu wa em sakhiat i thrang wow leh yeini i kaam, wa madei wa yoh sakhiat ki ka laad u chah sikai katwon da man iwa pynmyntoi ya ki kamjooh yaka yung ka sem yong ki.
Da ong u leh hawa da pyndep yei sikai chet najrong wa yoh leh ya ki tiar toh u sdang kreh wot ya itæ i khih wym toh wow lai chah sikai sa ha kiwi won ki laiñ, neibhah lada leh kamtæ ym ye u pliah ya kawon kawon ka kaam.
“I khih boon ko tang kat chawa kyruiñ, wot ki kaam wa khian dooh leh da wan kreh da kiwa na baar jylla wot hawa toh ka kaam wa ye hi u kreh da i leh.” da ong u Wailad.
Heijooh i por kyntu u ya ki khon khynroo khyllood wa lada emkaam yarap ki neibynta kawon kawon ka kaam wa sdang ki, oo man u uwa smat wow kyrchaan wow e yarap ya ki.
