Shillong: I leh burom wa khaddooh ya u Lurshai Hynniewta uwa man u dkhot ka Khasi Students’ Union (KSU) da pyndep noh ynne ka sngi hapyrdi i sñiawsih kthang. Ya ka niam ka rukom da pyndep deiwa thang ha u loom thang-bru ka Seng Khasi Sohra.
Ha kani ka sngi kiwa da poi wow sñiawlem hajrong ini i dooh, kynthup i ya kiwa yahkhmat ka KSU, FKJGP, HNYF wa kiwi hei emlang kiwa hayung hasem, kiwa maya wa ki marjan. Ha kani ka sngi da yoo leh yei yei chimbynta ki bru pawkhmat ka jylla kiwa da leh wow leh burom khaddooh ya u Lurshai.
Kam wow pynkynmoo wa ha ka 28 tarik u bnai wa da dep, u Lurshai kam u dkhot ka KSU da lai u wow chimbynta ha ka yalang pynsñiawthooh paidbah ka seiñ hajrong i pynemkaam ya ka ILP wa i maa na ka CAA kawa da pynman ha ka chnong Ichamati. Tangwa hadien wa wai katai ka yalang, ki dkhot ka KSU wa kiwi ki seiñbhalang kiwa lai cha katai ka yalang da chah hiar thma syndet ki ha ki baar jylla kiwa da dat da bom wei dung naphang ya ki khynroo Khasi, ha ini i jia boon ki dkhot ka seiñ da mynsoo ki wei u Lurshai da mynsoo joor u wei da khlaad noh u ha katai ka janmiet ha CHC Sohra.
Discussion about this post