Ka 8 tarik Naikhynde toh kawi na ki sngi wa khroo wa kyrpang ki ri ka pyrthai chityllup ya kawa da tip kam ka World Literacy Day namo ka sngi kyrpang yong i thoh, i puræ, puthi heiwa ka thong wa i thmu wa hakhmat dooh yong ka UNESCO wow booh u sdang ya kani ka sngi toh yow pynkynmoo næ kyrsu thiah ya waroh ki bru wa chong chnong nadooh ki khian hadooh ki heh wow yakrehlang hei wow kyntu kynrong yei puræ puthi ha ki dur ki rukom waphær deiwa ya lailang wei yah ka juk ka por.
I kynaad i tynjooh yong ka kjut khlam COVID-19 ha kini ki ar snem, da yoo da chem wa man i khanglaad khangluti wow leh burom ya kani ka sngi kamwa jooh man ha ki snem wa da lai, chooh chooh leh i puræ puthi ki khynnah nadooh ki khian hadooh ki heh daman iwa thut wa tkoh heiwa ki yungskur næ ki thaw puræ waphær da hap u khang khyrdep.
Hapyrdi ini i kutlaad yong i wymye u pynman kiwon kiwon ki yalang kyrpang wa yatoh wa ka World Literacy Day yong uni u snem 2021, man won ka khubor wa sñiawsuk u tip wei yoosuk u sakhi wa dei pynchlur ka chnat krehkaam yong ka SSA, West Jaiñtia Hills District chirup wei chimkhia ki bor pait bor pynlai yong ki skur deilang wei bood ryntih ya ki kyndon, i leh burom ya kani ka sngi man iwa lai bait heiwa ki khynnah skur na man i yung i sem næ neiwon neiwon i thaw wa em ki da chimbynta chongchit ki wow pynyoo yei man kyrpang yong kani ka sngi wei wow e wyrta chula leh hakhmat ka pyrthai yei man khroo kani ka sngi deiwa dro ya ki dur, i thoh wei puræ ya ki poitri wa kiwi kiwi kiwa klam wa khana yei man kordor yong i stat i tip ha kani ka juk ka por wa katni chirup wei kylla i talung yong i por.
Chooh chooh neiliang ka UNESCO da pyndep ko yei leh burom ya ka World Literacy Day ha uni u snem kam ka mat kyrpang wa ong “Literacy for a human centered recovery. Narrowing the digital divide”
