Ka chnong Narwan man ko kawi na ki chnong kawa da rim tam kawa mih na ka chnong Shangpung nadooh ki por warim wajah, heiwa ki bru na ka chnong Shangpung da lai rep lai riang ki cha i thaw iwa pyrtuid Narwan wei suki suki na kani ka lai rep lyngkha da sdang ki u sah bri cha ki thaw rep ki yong ki wei suki suki da sdang noh ki u chong u sah syndon hadooh wa daman ko kam ka chnong.
Hadien wa da man ko kam ka chnong leh, i lai ia wan, ka lai yaaw lai haat dang skem bha ko ha kitu ki por, heiwa haman ka sngi yaaw Muchai kawa em ha Shangpung, kiwa chong chnong na Narwan leh da ya lai yaaw ki ha kani ka yaaw wei suki suki neidaw wa man ka luti kawa khohroh khohram wei wym lait sarok, da pynman ya ki wa hap ki u lai kjat da ki boon boon kynta yow poi cha kani ka yaaw. Kani ka kaap kjat leh da dooh da dam ko ha kini ki sngi wa katni, wei ha ki pateiñ wa katni da sah sadu ha ki khana parom yong ki waheh kiwa jooh lai na uni u luti ha kitu ki por.
Kamtæ ynne ka 15 tarik, da man ko ka sngi ka wow sah kynmoo ya ki khon khynroo khyllood yong ka chnong Narwan chynrang wa kynthai deilang wa ki khynnah kiwa da ya chimbynta ym duna ya 100 ngut ha kani ka lai kjat hei yah luti u Lamsuk Langstang uwa man leh u Waheh Chnong ka Narwan kamjooh u Teibor Chulet uwa man leh u President ka Seiñ Raij Narwan.
Ha ini i lai kjat da sdang nadooh na madan Mooknor Narwan heipor 4:30 i step ryngkat wa ka ngooh ka dem na kiwa yahkhmat ka Seiñ Raij wei i lai luti dapoi lyngba ka chnong Byrwai neitæ da kaap lyngba ka pynthor Mannar wei da poi leh ha ka chnong Khliehrangnah khaddooh dapoi ha ka chnong Shangpung heipor 9:00 waje i step wei da pdiang burom ya kini da ki waheh Seiñ Raij Shangpung wei da yoh leh u ya embynta lang ha ka lehkmen sngi laitlooid namo ka Independence Day ha ka chnong Shangpung.
Heipor 12:00 waje pyrdi sngi won da yoh wow lai booh syntu ha u mot sahnaam u Kiri Daloi Dhar uwi na ki khlawait uwa da chah siat yap hawa yaleh pyrchah waka sorkar pharæng wei heini da yoh leh ya ki kyntien sneiñ kyntien kroo na ki waheh ka Shangpung kamjooh na u Waheh Chnong Narwan.
I thmu yong kani ka lai kjat toh kam chibynta i pynkynmoo cha ki khon khynroo khyllood ya ka luti wa jooh lai ki warim wajah kamjooh leh neibynta u yoh yei chait i tram i doh i pran heijooh i por kam wow warom ya ki bru khroo ka ri, ki wym kheiñ de ya idæ neibynta wow pynyoh ya ka synchaar laitlooid na kti ki pharæng heijooh i por leh yow neh u sah ka maya kylliang hapyrdi ka chnong Narwan waka chnong Shangpung kawa man leh ka Headquarter yong ka Elaka.
Waroh kiwa ya chimbynta ha ini i kaap kjat dap ki dei lungmynsien wei kmen u yoh u booddien ya ki luti lai kjat, lai yaaw lai haat ki warim wajah heipor wym pu em sarok.
I pyntip na u L. Shadap, General Secretary ka chnong Narwan.
Discussion about this post