Deiwa lai bait lai ryntih wei phooh i phieñ kut noh ka Meghalaya Games 2025

Ka lympung yalehke wa tip kam ka 6^th Meghalaya Games 2025, ynne i janmiet da poi ko cha wakut ha ka yalang pynhaap pyrda wa da pynman ha Kiang Nangbah Stadium, Jowai heiwa u Symbood Montri Rangbah, u Sniawbhalang Dhar da man u kam u kongsan hei emlang u MLA ka Jowai, u Wailadmiki Shylla.

Ha kani ka janmiet da mih leh da ki hajar ngut kiwa chimbynta ha kani ka Meghalaya Games kamjooh leh ki hajar ngut ki paidbah wa wan sakhi ya kani ka yalang pynkut.

U Wailadmiki hawa e i klam da ong u wa kattu da ye wow ong wa kani ka lympung man ko kawa jop deiwa pynsñiaw yei kmen mynsien u wow ye u booh ya ka parom wow sahkynmoo.

Da yaroh wei da sñiawngooh u ya waroh wa da pynman ya ka Meghalaya Games kawa jop neibhah heipor wa pynbna wow pynman ya ka lympung ha Jowai da pyrkhat u wa man iwa eh bha wow pynlai bait ya ka tangwa dei krehlang yong waroh da poi hadooh ynne ka sngi.

Chooh chooh da ong u wa da yaleh katwa ye wow pyndap yeiwa duna waroh tangwa emkaam u ksoh yeiwa bha khamtam u maad ya ki baam Jaiñtia kam i jadoh wei dohkhleh neibhah hawa lai i cha Ri-loom Garo ym dam de i wow baam yei Nakham.

Ha kani ka janmiet da pynkup burom leh ya u Kamtre Sumer wa pynwandur ya u Maskot wa tip kam ‘U Kiang’, kamjooh kiwa chna wa kiwa rwai ya i sur Niom Bait Naphang iwa man i sur yong kani ka lympung deilang ka Music Video.

U Sniawbhalang Dhar da e khublei u ya waroh wa pynman ya ka lympung kawa jop khamtam ya u Wailadmiki Shylla wa u Montri ka chnat Sports, u Shakliar Warjri.

Da e khublei u leh ya ka sorkar wa da jied ya ka West Jaiñtia Hills wow pynman ya kani ka lympung yalehke wa 6, deiwa ong leh wa daw ye leh u pdiang wot ya ka National Games.

Heiyatoh waka 7^th Meghalaya Games, da pyntip u wa ym pu pynbna heiwon u pynman ka neidaw wa dang yakhun wow wanrah ya ka National Games hapoh ka jylla ha u 2027 wei yow ye u leh yeini daw chimpor hadooh ar snem i pynkhreh.

Chooh chooh da ong u wa kmen u wow yoo ya ki khynnah na ki le bynta ka jylla wow wanlang ki chirup wow chimbynta ha kani ka lympung.

Da ong u leh wa ha ka jylla ymtoh wow pynman donhi ya ka lympung tangwa wow pynwandur ya ka mynried ki khynnah kawa miat.

Da sñiawngooh u ya kiwa chong chnong wa nadooh wa sdang hadooh ynne ka sngi ym em iwi wot leh i thut deiwa e khublei ya ki chnong wa da krehlang waka sorkar wa man ka lympung kawa jop.

Ya i naam Best Athlete ha ka Athletics da jop Damika R Lyngdoh na West Jaiñtia Hills, katwa ki chynrang won da yoh u Henry Yoga A Sangma na North Garo Hills.

I naam 2nd Runner Up da lai i cha ka Ri-Bhoi kawa yoh 104 tylli ki takma, ka 1st Runner Up toh ka West Jaiñtia Hills wa yoh 108 tylli ki takma katwa i naam jop namo ki  Overall Champion da lai i cha ka East Khasi Hills kawa yoh 381 tylli ki takma.

Da pynphooh ya kani ka janmiet da ki rwai, ki Video yong kani ka lympung, kamjooh i tem DJ wa i thang bomkala.