I phah ka sorkar India wow pynyabi ya u Aadhaar Card wa ki Card Ration yow yoh ya ka Scheme PDS, da pynman ko ya palat 1000 tylli ki manyung ha ka jylla Meghalaya wow lai pyndem (Surrender) noh ya ki Card Ration.
U Montri wa pait ya ka kaam Pynpoi Marbaam, u Comingone Ymbon da ong u wa i phah pynyabi ya u Aadhaar toh yow khooid i pynkrehkaam ya kani ka Scheme wei yow chem leh ya kiwa leh thok næ leh buit-tooh, heiwa da khana u wa hadien wa da pynyabi ya u Aadhaar wei da leh ya ka eKYC ym duna ya 1000 tylli ki Card Ration kiwa da hap wow pynuiñ namo wow Surrender noh.
Da khana u wa ki Card Ration wa ki bru da hap wow pynuiñ noh em ki kamwa 600 tylli ha East Khasi Hills, kamwa 400 tylli ha Ri-Bhoi wa ha South West Khasi Hills hapoh 100 tylli.
Da ong u wa hadien wa da pynyabi ya u Aadhaar lyngba ka eKYC, da chem wa em ki wym em hok wow yoh wei da em leh kiwa kreh sorkar wei em won kiwa em ar tylli ki Card Ration wei da pynrap u wa ini da yarap bha ko wow pyndooh yei leh thok.
Hawa kylli, da ong uwa hadooh kattæ ym pu em ki wym kwah u leh Aadhaar kiwa da pynuiñ ya ka Card Ration.
Hawa pynsñiaw wa kiwa boon ki bru khih-klang ki manda poi ka um ha rdang, u Montri da ong u wa ka sorkar India da e por ko hadooh ka 30-06-25 wow pynyabi ya u Aadhaar wa ka Ration Card, wei hadooh kattæ du 63.5% kiwa da leh yeini, tangwa da ong won u wa kitu ki wym pu em u pynyabi ya u Aadhaar daw yoh khoo ki hadooh u Naisaphra neidaw wa ya ki marbaam dadep pynpoi chwa ha i por wa krehkaam ka Operation Sindoor.
Hawa kylli chooh chooh, u Montri da ong u wa ka Scheme PDS næ i saaam khoo rachon toh ka Scheme ka sorkar pyrdi wei kawon kawon ka Scheme wa toh ka yong ka sorkar pyrdi daw hap bait wow pynyabi wa u Aadhaar.
Discussion about this post