Kam chibynta ka National Youth Day 2025, yow pynsñiawthooh ya ki khon khynroo khyllood hajrong i kjut HIV/AIDS deiwa pynman i yachemlang kamjooh i lehke Sports, neiliang ka Meghalaya State AIDS Control Society (MSACS), chirup i yakrehlang ka Mih-Myntdu Community Social Welfare Association (MCSWA), da pynman ki da ka Futsal Tournament haka 30 wa 31 tarik uni u January ha Chalton Futsal Ground, Moosalyngkat.
Ha ka sngi sdang kani ka lympung haka 30 tarik da emlang ki bor pait bor pynlai napoh ka Meghalaya State AIDS Control Society, na ka District Sports Association, ka Mih-Myntdu Community Social Welfare Association (MCSWA), heiwa u Dr. Khamjan Chyrmang kam u Youth Icon neibynta ki khynroo khyllood da pachat u ki kyntien e mynsien.
Ha kani ka lympung da em hadooh 16 tylli ki liang wa wan chimbynta wei da pynyoo ki leh yei sap i tap yalehke yong ki.
Yei naam jop da rah ka East Block kawa da yoh ya ka song poisa wa Rs. 10,000. Hei kyrdan 1st Runner Up da yoh ka Wahlama deilang ka poisa wa Rs. 7,000 katwa yei naam 2nd Runner Up da yoh ka Salini Colony deilang ka poisa wa Rs. 5,000.
Ha ka sngi pynkut won da wan emlang u Ajoy Lanong, Deputy Director, MSACS, deilang ki bor pait bor pynlai ka Meghalaya State AIDS Control Society waka Director kamjooh kiwa kreh ka MCSWA.
Da pynsñiaw leh ha kani ka sngi hajrong i emkaam ka yalehke Sports neibynta i chait i khiah wei wow rah leh ka khubor pynsñiaw paidbah hajrong kammon u yada nei kjut HIV/AIDS.
Discussion about this post