Ha ka 14 tarik uni u bnai, ka Cadenza School of Music Shangpung da pynman ko ya ka lehkmen Advance Christmas ha Rev. Anthony Crockett Memorial Building, Shangpung Mission.
Da sdang da ka yaseiñ duwai kawa pynlai da u Spiterfield Lyngdoh Giri deiwa ya emlang wa ki kattu katni ki dkhot ka Committee yong ka Balang, ki dkhot yong ka Junior C.E Society, u waheh chnong ka Shangpung Mission, ki dkhot yong kani ka Music School, ki khynnah wa lai puræ ha kani ka Music School wei deilang ki dkhot ka Meghalaya Grassroots Music Project.
Da yoh yei puræ wei duwai na ka Ibalari Lytan wa i rwai kyrpang na ka Madiza Bareh waka Jiphilahrne War Nongbri (Duet). Da pynbood sa i klam tbian na u Principal yong kani ka Music School, u Kenneth Anderson Iakai wei da pynchlur u leh ya ki khynnah wow Register ha ka Meghalaya Grassroots Music Project wa pynlai da ka Meghalaya Tourism kawa man leh kawi na ki rynsan ya ki khynnah wow yoh ki u maad u rwai u tem hakhmat ki paidbah kamjooh wow pynyoo yei sap yong ki ha ki rwai ki tem wei kamjooh ye ki leh wow yoh kamai lyngba kani ka Project.
Da yoh leh yei klam na u Tbn. Kermiki Iakai uwa da klam chaphang ka sngikha ya u Jisu Christ wei da e mynsien u leh ya ki khynnah ha ka liang ka put ka tem wow nang lai ki chaphrang wei wow kreh chitom neibhah ha kani ka juk kawa katni ka put ka tem da nang ku bha wei ye ki leh wow kamai lyngba kani wei ymtoh u pynsepai yei sap wa em ki.
Ha kani ka yalang da yoh leh wow saam ya ki Award cha ki khynnah wa da pyndep ya ka Exam ha ka Music.
Da e leh ya ka khusnaam cha u Eleazer Lytep uwa da yoh psiah ha ka Top 10 ha ka 9th Position ha ka HSSLC (Commerce) uwa man leh kam u khynnah kani ka Music School.
Da em leh i ah ya u Cake wei da pynkyntang ya u Cake da u waheh chnong ka Shangpung Mission, u R.N. Born Suchiang.
Ha kani ka yalang wa pynlai da u Dr. Reconcile Langstang da yoh yei rwai wa i tem (Instrumental) na ki khynnah kani ka Music School heiwa kiwa da chimbynta da em ki 38 ngut.
Da pynwai ya kani ka Advance Christmas da i duwai tbian wa i kyrkhu pynwai na u Tbn. Wamehi Law.
Discussion about this post