Ki bor District ka East Jaiñtia Hills chirup ka yung krehkaam ka District Social Welfare, East Jaiñtia Hills ynne ka sngi da wai ki ya ka bynta wa ar ka Nasha Mukt Bharat Abhiyaan yong ka Ministry of Social Justice and Empowerment ka sorkar India, kawa toh ka thong kreh neibynta u pyndooh pyndam yei dih pynmuaid khamtam i Drugs iwa da ktah chawa palat ya uwa dih, yaka yung ka sem wa ka imlang sahlang waroh kawi.
Yaka yalang wai paidbah da pynman ha Ladrymbai Dongwah Community Hall wei da wan wai yaka da u Montri ka chnat Social Welfare ka sorkar jylla, u Kyrmen Shylla chirup i emlang u DC ka East Jaiñtia Hills District, u Abilash Baranwal, ka R. Passah, District Social Welfare Officer, East Jaiñtia Hills, ki khynnah skur, ki seiñ waphær waphær, ka Tuber Bikers & Tour Association, kiwa yahkhmat chnong wa kiwi de.
Ka Ananya Majumder, Senior State Coordinator, Ministry of Social Justice and Empowerment hawa klam yahkhmat ong ko yaka Nasha Mukt Abhiyaan da sdang ha u snem 2020 ha ki 272 tylli ki District ka ri, hajrong ka thong u pynsñiawthooh ha ki thaw puræ, ki skur yei maa i Drugs wa kiwi ki jait dih pynmuaid.
Wei lyngba i lai luti khana ko wa da kynjooh hadooh kamwa 8 klur ngut ki bru ha ka ri wa kynthup 2.9 klur ki khynroo wa 1.9 klur ki kynthai najrong wa da yoh lai pynsñiawthooh hadooh 1.6 lak tylli ki thaw puræ.
Kamtæ yooluti ko sam chakhmat daw ye chooh chooh u pynpoor yei sñiawthooh, wei ong haroh ko wa yaka East Jaiñtia Hills District da chim kam kawi na kawa boon dooh kitæ kiwa choon yaka imlang sahlang lyngba i ngop hei dih Drugs.
U Additional SP ka East Jaiñtia Hills, u B. Jyrwa hawa klam, khut u yei yakrehlang ki paidbah khnang yow ye u pyndooh pyndam yei Drugs neibhah du ki pulit wym ye ki u leh iyi iyi. Kyntu haroh u ya ki paidbah wa chong chnong wow syndong bha ki yaki bru wa psiah wa mih hapoh chnong kiwa wanrah i baam i dih wei hawa yoo kam kini toh u pyntip wut wut cha ki pulit deiwa Phone ha u Number 112 heiwon iwon i por.
Ong haroh u wa boon kiwa ngop Drugs toh kiwa hapyrdi i rta 15 hadooh 20 snem i rta, wei kitu hi ki bru wa jied yei Drugs da man wa jied ki yei yap hei im wa kynthup nadooh i yap hei puræ puthi næ kawon kawon ka thong wa mang hei im.
U DC ka East Jaiñtia Hills won da ong u wa boon kiwa maad yei Drugs wa ki jait dih pynmuaid na ki daw waphær wa chem ki hawa im, tangwa ym mut won wa deiwa leh kamni u man ka laad pynwiar ya iwon iwon i eh i khoo tangwa nangpynsih chooh chooh ko.
U Kyrmen Shylla won hawa klam pynsñiaw u yei lai luti ki katu katni ngut wa da ngop hei Drugs kiwa tipmit hi u, heiwa da sñiawthooh u wa chisien da maad da eh u kylla næ u uiñ biang chei im wa nachwa, wei i rta yong ki leh tbian noh i neidaw wa chah ktah.
Khana u wa oo leh hei por wa dang lai puræ da jan ngop u hei Drugs tangwa deiwa tip u yei eh i jynjar wa mih na i Drugs kamjooh leh wa tieñ burom u ya ka bei u pa tæ lait u khlem bien u maad.
Kamtæ yooluti u wa lyngba i yoh laad kam kini ki pynsñiawthooh daw man i myntoi ya ki paidbah hachwa u pyrchang ki.
Da yaroh u leh ya ki pulit ka Anti-Narcotics Task Force yong ka East Jaiñtia Hills kiwa man-i-por da yoh kem ki ya ki bru wa kit Drugs wa lai luti lyngba ka jylla neibhah kini hi ki jooh wa chim kabu ya ki bru hapoh ka jylla yow dai Drugs.
