Da: U Shimphang Lyngdoh
Ka yingkieñ Um-Soowai wa em ha khap ka chnong Ladrymbai wa ka chnong Moolamanoh da man ko ka yingkieñ kawa em hei maa neidaw wa ki paya yong ka ym chan skem de ki. Kani ka yingkieñ da pynyabi ko kamwa 7 tylli ki chnong kitæ toh ka Moolamanoh, Moolang, Musniang Jongdeng, Musniangrim, Rangad, Moonongtdu wa ka Lumputhoi.
U Ma Simon Siangshai (baam kwai ha dwar u Blai) da man u kaam u MLA heipor wa chna ya kani ka yingkieñ wei uwa da jop Electon hadooh le sien lynter ha ki snem 1988,1993,1998 heiwa ka thaaiñ 7-Chnong man ko ka thaaiñ kawa maya bha ya oo, wei man ko leh ka thaaiñ kawa kyrchaan dohyap bha wow pynjop ya oo kam uwa mihkhmat paidbah ha kitai ki snem.
Chwa wow chna ya kani ka yingkeiñ, ki paidbah ka thaaiñ 7-Chnong kiwa lai yaaw lai haat cha Ladrymbai, Khliehriat kamjooh cha Jowai da lai ki na kani ka Wah Um-Soowai wei da maad ki leh chiboon i chitom saja wow kaap ya kani ka wah khamtam heipor lyiur wa joor u slap. Boonsien da hap ki wow uiñ kylla chadien hawa joor i kmai um wei em leh ki por da pynemkaam ki da ki lieñ hawa rap duna ka um wow kaap cha chiliang ka wah neibynta i emkaam yong ki cha yaaw cha haat wow thooh dawai dachin wei em leh ki bru wa yah lieñ kiwa chah rah ha kani ka wah khamtam heipor lyiur wa kmai ka um.
Related posts
Ha u snem 1993, u (L) Simon Siangshai kam u MLA kani ka thaaiñ da yoh oo u man kaam u Minister ha ka sorkar Meghalaya kamwa du 14 bnai donhi deiwa ksoh ya ka chnat “Border Area Development”. Kamtæ da pynbna paidbah u wow chna da ka yingkieñ ha kani ka Wah Um-Soowai iwa da pynkmen ya ki paidbah ka thaaiñ 7-Chnong hadooh kattæ kattæ, wei da chna ya ka ha u snem 1994. Mar ya sdang u chna ya kani ka yingkieñ kam ka dak wa sñiawngooh sñiaw burom ya u MLA u (L) Simon Siangshai, ka thaaiñ Rangad kawa em le tylli ki chnong kitæ ka Rangad, Moonongtdu wa Lumputhoi ha ka yalap Election kawa bood da pynmih ki iwi i sur rwai ktien wa khlem i tem kamni:
“Da ki phaw phaw snem wa dadep da lai,
Dei chitom wei saja u maad i hai-pa-ri-hai;
Kat mynnu ma-ai u lait i na kini waroh,
Kam u tylle ya i wa khoom wa kdoh.
U Ma Simon toh u bru wa sñiawthooh,
Lada tbian ki rynyieñ khalah u dei chrooh;
Da ka lieñ u chong boon kiwa tieñsar,
Jop u Ma Simon da ptieñ u da ka naar.
Luti syngkieñ kattu ya i da suk,
Ya u Ma Simon i wym mylliñ de;
I chitom saja maad i nachwa ki sngi,
Sa chisien u phah ya oo cha Assembly.
Kamtæ ha ka yalap Election da ya rwai lang ki paidbah ka thaaiñ 7-Chnong da ini i sur kamjooh waroh hi ka 2-Rymbai Constituency deiwa pynjop biang ya oo sa chisien ha u snem 1998.
Na kani ka yingkieñ lait ko leh u lai cha kiwi tawon ki chnong najrong ka thaaiñ 7-Chnong kam cha ka chnong Lumshyrmit chadooh Kongong, kamjooh cha ka chnong Lumshken, Wahsarang, Rymbai, Iapmala, Suchen ter-ter chadooh ka chnong Pdengshakap thaaiñ War. Kamtæ kani ka yingkeiñ wa ka sarok man ko kawa emkaam bha neibynta i lai i wan, ka khayi ka khaba, ka kamai ja-kpoh nadooh kiwa kamai kari hadooh kiwa khih wa kamai wa boonjait. Pynsuk ko leh ya ki paidbah wa lai wa wan hawa em i sahblok kari nadooh Kongong hadooh Khliehriat deiwa lai na kani ka yingkieñ wa ka sarok, da man ko leh kaam chibynta i bha i miat wa i suk i saaiñ ka imlang sahlang khamtam hei lai hei wan.
Kiwa ksoh kaam yong ka thaaiñ 7-Chnong kawa tip kaam ka “Ynñiaw Chnong Welfare Organisation” boonsien da lai yachem khnang ki yow pynap pynsñiaw cha ki bor watoh u pait, khamtam cha ka chnat PWD wa cha kiwa mihkhmat paidbah yow leh ki yeiwa emkaam. Kamtæ neiliang ka yung krehkaam ka chnat PWD leh da mana ko wym hoi u kit palatpood ki kari hawa lai luti ki na kani ka yingkieñ iwa palat ya ka 9 Ton.
Kamtæ nga kam u bru samen na ka thaaiñ 7-Chnong wa em i sñiawkhia ya ka imlang sahlang kyrpaad joor O ya ki chnat sorkar wa toh u pait khamtam ya kiwa mihkhmat paidbah MLA/MP wow chimkhia ki wow chna pynbha ya kani ka yingkieñ katkam kani ka juk wa thymme khnang yow lait na iwon iwon i jia hadien habood.
Discussion about this post