Ka seiñ KSU-Namdong Unit ynnin ka 21 tarik hapoh i yahkhmat u President yong ka, u Chanbor War wa u President ka Nartiang Unit, u Habanjop Raliang da lai yachem ki ya u Superintendent Engineer ka Meghalaya Energy Corporation Limited (MeECL) West Jaiñtia Hills District, Jowai u J. Patlong.
Ha ini i lai yachem da kyrpad wow booh ya ka 33KV Sub-Station ha ka thaaiñ Namdong, West Jaiñtia Hills, heiwa ka seiñ da sñiaw diaw ko hajrong ini i eh i khoo wa chem ki paidbah ka thaaiñ nei dooh bordiñ.
Da kdaw ko leh wa ka Nartiang Sub-Station ymye ko wow kit namo wow kynjoh nadooh ki thaaiñ Namdong ter ter chadooh ki thaw khappood yeiwa neiliang u sahep da ong u wa da em i tyrwa (Proposal) neibynta ka Sub-Station wei dang man ko kawa sahteiñ hadooh katni.
Neiliang ka seiñ da kular ko leh wow booddien yeini deiwa kyrpaad ya ki bor wa hajrong wow leh yeiwa emkaam neibynta i myntoi ki paidbah.
