Ka Shangpung SC da jop suk ko da 107 Run ya ka Evergreen Mukhla Mission SC ha ka yalehke ynne ka sngi kam chibynta ka District Cricket League 2026 wa pynlai da ka West Jaiñtia Hills District Cricket Association.
Ya ka kylla-khlem da jop da ka Evergreen Mukhla Mission kawa da jied wow kawang bol nyngkong. Ka Shangpung hawa Bat nyngkong da kamai ko 177 Run deiwa dooh lut ko waroh ki Wicket na ki 31.1 Over. Na ki da em em ar ngut kiwa yoh nod (0 Run), wa du le ngut kiwa kamai ar dak, u Elvira Miwanvi Sayoo uwa da kamai 37 Run na ki 34 bol wa kynthup wa 4 tylli ki 4 Run, u Melamki Wann won da kamai u 31 Run na ki 60 bol wa kynthup wa 4 tylli ki 4 Run, katwa u Dabiang Law da tied u 28 Run na ki 48 bol wa kynthup ya 2 tylli ki 4 Run. Na kiwa kawang bol ka Evergreen Mukhla Mission, u Shoristar Sumer (C) da yoh u pynhaap 3 Wicket, katwa u Felixson Bang wa u Treibor Sana da yoh ki u pynhaap mar ar Wicket samen na ki 7 Over.
Ka Evergreen Mukhla Mission hawa beh ya ka thong da ye ko kamai du 70 Run wei da haap lut ko waroh ki Wicket ha ki 20 Over. Da em hadooh 4 ngut napyrdi kiwa kiwa da yoh nod, wa du ar ngut won kiwa ye u tied ar dak. U Winchester Tang wa u Dangahi Suna kiwa kamai ki mar 15 Run samen. U Rishot I Suchiang uwa kawang bol yong ka Shangpung da yoh u pynhaap 7 Wicket na ki 7 Over, katwa u Ebormi Laloo won da yoh u pynhaap 2 Wicket na ki 5 Over.
Yei naam Man of the Match da yoh rah da u Rishot I Suchiang uwa kawang bol ka Shangpung uwa yoh pynhaap boon Wicket.
Ka yalehke mynstep ka 26 tarik toh hapyrdi ka Lion Y&SA pyrchah ya ka Moodymmai SU hei por 9:00 i step.
Ya ka Digital Live Score yong kani ka League ye phi u pait ha https://cricheroes.com/tournament/1881561/wjhdca-district-cricket-league-2026/matches/live-matches
Discussion about this post