Ka Seiñ JSU Central Body lyngba u President ka seiñ u Jersom Shylla wa u Assistant General Secretary u Neilkee R Mukhim da kylli ki ya ki 7ngut ki MLA ka Ri-loom Jaiñtia heijooh i por leh ya kitu kiwa man kam ki montri hapoh ka sorkar MDA wa neiyi i daw wa dooh bhah ka Ri-loom Jaiñtia ya ka 100 thawthiah Prefab Corona Care Centre katwa ka Shillong wa ka Tura da yoh bhah ki.
Ka seiñ hadien wa da tip ko yeini da sñiawsih joor ko wa neipor cheipor ka thaaiñ da chah pyndooh bhah ko ha waroh ki bynta khamtam ha i roi i paar waphær waphær.
Kamwa da tip ka Ri-loom Jaiñtia da man ko kawi na ki District wa chah ktah bha ha uni u COVID-19 tæ miat hi wow em kani ka 100 pyllong thiah namo ka Prefab Corona Care Centers khnang u ye u yakhun ya kani ka khlam wa da joor bha ha ka District khamtam ya ka jylla hi waroh kawi. Ka seiñ da kyntu ko ya ki chnong wa em ha kylleiñ ka Ri-loom Jaiñtia wow booh ya ki Community Isolation Centre wei da e khublei ko ya kiwa boon ki dong hapoh Jowai kiwa da booh ya kini ki Centre kiwa man leh ka nuksa ya kiwi tawon ki chnong khnang wow yarap ya kitu wa yoh ya kani ka kjut wei heiwi bynta leh yow lait ko u yabi chawi.
Neiliang ka seiñ da kyrpaad joor ko ko ya ki 7ngut ki MLA ka thaaiñ wow chimkhia ki u booddien yeini kamwa da tip i lada em kam kani ka Hospital wei wow wai biang kiwi tawon ki Corana Care Centre, daw yarap ko chiboon ya ki bru wa yoh ya u khñiang khamtam kamwa pynkhreh ya ka la-ær wa le yong kani ka khlam.
Heijooh i por leh ka JSU da pynchlur ko ya ki chnong ki thaw ki seiñ kreh monsñiawbha u wan ki cha khmat u pynboon ki ya ki Corona Center khnang u ye i u yakhun ya kani ka khlam kawa da ktah ya ka ri waroh kawi.
