Katkam ka wyrta wada yoh na u J. Phawa, President wa u C. Sungoh, Secretary ka seiñ All Hynñiewtrep People United Front (AHPUF) da em i dooh bordiñ haka chnong Mihmyntdu, Moowamon waroh kawi nadooh i por 12:30 i step synyaw ka 15 tarik hadooh kamwa 3:00-4:00 i janmiet kani ka jooh ka sngi.
Da ong ki wa ini i jia wymtoh mih i neidaw ka Load Shedding tangwa neidaw wa kheiñ wa haap ka chnat dieñ kseh wa em hajan ka yung krehkaam u District Transport Officer, West Jaiñtia Hills District.
“Kamwa da yoo lut i waroh wa kini ki chnat dieñ kseh toh kiwa da doon cha pyrdi sarok National Highway wa em ha kani ka thaw, wei em leh kiwa da heh rta kiwa da yap kiwa ye u kheiñ u haap heiwon iwon i por i wym poi pyrkhat iwa ye u ngat ha ki kari wot ha ki bru kiwa lai wa wan ha kani ka sarok,” da ong ka seiñ.
Da ong ki wa ka ka seiñ haka 31 u Wisu 2022 da lai e dorkhat ko cha u Manager ka Meghalaya Transport Corporation (MTC) yong ka Jowai Depot wow pait ya kini ki dieñ namo wow thwat ya ki chnat næ wow thyllem ya ki wow lait nei jia wa sñiawsih tangwa ka MTC ym em mano ko yeini. Heiwa ini i thaw toh i yong ka MTC.
Kamtæ ka seiñ da kyrpaad wei da dawa ko ya ka MTC wow pynsmat ko u lai pait ya kini ki dieñ lym kamtæ, lada jia iwon iwon iwa sñiawsih ka chnat wow bahkhlieh kat yeiwa jia.
