Hadien kamwa chi tayaaw wa jia i chah siat yap ki san ngut kiwa chong chnong ka Mukroh ha ka 22 tarik uni u bnai ha ki pulit wa ki Forest Guard ka sorkar Assam, neiliang u Wyrta ynne ka sngi da lai biang u cha kani ka chnong.
Ynne da yoh u yaklam waka Skhem Sten kawa man kawi ka manbei kawa da dooh ya u kurim yong ka ha ka 22 tarik, u T. Shadap uwa 48 snem i rta uwa da ieh chadien ya san ngut ki khon wa le ngut ki ksu.
Kani ka manbei da jooh maad teiñ ko ya i chah thombor ka yung yong ka heiwa ha ka 8 Thohlakhmi (Feb) 2003 da chah siat yap u payu waheh yong ka, u Dia Sten ha ki suba damok kieñ suloi lane ha ki pulit Assam.
Hadien ini waroh neiliang u Montri Rangbah ka jylla Meghalaya wa kiwi ki Montri ka sorkar jylla ha ka 23 tarik tarik uni u bnai da wan pyntngen ki ya kani ka manyung chirup wa ka poisa yarap wa T. 5 lak.
Hajrong ini waroh hawa kylli na kani ka manbei yei tyrwa yarap ka sorkar Assam wa T. 5 lak, da ong ko wa la man katwa man leh ymye ko wow pdiang ya kani ka poisa kawa da chim ya ar ngut ki mynsien na ka yung yong ka.
Wei hadien wa tip yeiwa chah siat yap u kurim ko, da kyntait ko ya iwon iwon i yarap naka sorkar Assam neibhah wa ka ymtoh kawa chong chnong ka Assam tangwa kawa na Meghalaya wei ini i leh ki pulit wa ki bor damok ka Assam da chim ki hadooh 2 tylli ki mynsien wa kordor na ka yung yong ka.
