Jowai: Ki bei ki pa yong ki khynnah puræ haka Government Girls Higher Secondary School, Jowai, khamtam kiwa na thaaiñ nongkyndong, da pynsñiaw ki yei eh hadien wa ka Hostel yong katai ka skur ym ye de ko wow pdiang ya ki khynnah wa sah ha ka Hostel na i daw wa ka Building næ ka yung Hostel, da jæd da pra lut ko wei ye ko u oor ha iwon iwon i por.
Heiyatoh wa ini, ynne ka sngi neiliang ki dkhot ka Ri Jaintia Youth Federation (RJYF) da yoh ujor ki na ki bei ki pa yong ki khynnah skur kynthai kiwa na nongkyndong, ki dkhot ka seiñ da lai pait ki ya kani ka thaw sah ki khynnah kynthai, heiwa da chem sakhiat wa kani ka Building yong ka Hostel da man ko kawa da jæd wei em ko hapyrdi i ma, neiliang kiwa yahkhmat kiwa kynthup ya u Ebormi Pale u General Secretary, u Molith Laloo u Vice President deilang wa ki dkhot, da yoh laad ki wow yaklam waka Guardian næ kawa pait yong ka Hostel ka Banrilin Chyna, kawa da ong wa nadooh wa sdang yong uni u snem 2019, ym ye de u pdiang ya ki khynnah wow sah ha kani ka Hostel, neidaw wa kani ka Hosltel da jæd da pra ko wei em ko hei ma lada em wa sah heini wei kamwa man katni yaka ka Guardian kamjooh ya waroh kiwa na kani ka Hostel da phah kreh noh yaki cha ka skur yong ka Government Girls Higher Secondary School, Jowai.
Neiling ka Guardian da ong ko wa neiliang ki bor wa hajrong da dep ki wow lai cha ka chnat PWD kamjooh leh cha kiwi de kiwa toh u pait tagwa hadooh katni ym pu em wa yoo ya ki dak ki chin wow pynkreh ya kani ka Building wei kamjooh wow kyrriah yaka cha wi.
Heiyatoh wa i wym sñiaw chngaiñ de ya kani ka Hostel wow pynsah yaki khynnah skur, neiliang kiwa yahkhmat ka RJYF da booh ki ya i kyrpaad kawa joor ya ki bor wa toh u pait ya kani ka kaam wow leh ki ya iwa emkaam smat katwa ye, khnang wa ki khynnah puræ u yoh ki wow pynemkaam ya kani ka Hostel ha uni u snem wow wan, neibhah i wym ki Hostel yong ka skur Government ha sor, ktah ko ya ki khynnah wa dooh wa duk kiwa wan puræ na ki thaaiñ nongkyndong khamtam ya kitu kiwa na jngai chnong.
Neiliang ka seiñ da ong ko wa lada ka sorkar ym leh ko iyi iyi, ka seiñ daw lai ko chakhmat nei bynta i emkaam ki khynnah wa dooh wa duk hawa yatoh wa ka puræ puthi yong ki.
Discussion about this post