Ha ka Facebook Page ka Seng Khasi Kmie, u Education Secretary yong ka u Kular Khongjirem da klam u hajrong i man khian paaid (Minority Status) ki para Khasi.
Da ong u wa dang ha kani ka tayaw, ka sorkar da pynbna ko wa kitu ki khynnah puræ ha ki School wa College waphær waphær wa ye ki wow yaleh (Apply) ya ka bai yarap poisa næ Scholarship lada ki toh kiwa haap ha ka kyrdan Minority. Ka Minority Community toh kawa da kheiñ ya kitu kiwa khian paaid lane ki kynhun kiwa em i man kyrpang ha ka niam ka rukom wa ki riti ki dustur wei kiwa yaleh wow pynneh pynsah ya ini i man kyrpang.
Ha ri India, ha ka kyrdan National Level, ki jaitbru kiwa da tipmit (Recognised) da ka Riti Synchaar (Constitution of India) kam ki Minorities Groups toh ki Muslim, ki Christian, ki Parsi, ki Sikh, ki Buddhist wa ki Jain (ya ki Jain da tipmit ya ki kam ki Minority nadooh u snem 2014). Kini waroh da yoh ki ya ka kyrdan Minority Status ha ri India kamtæ kitu ki Khasi-Jaiñtia kiwa em ha ki niam yong kiwi kiwa da kylla Christan næ Muslim da yoh kabu ar maloi (Double Benefits) neibynta wow yoh Scholarship ha ki thaw puræ yong ki.
Katwa kitu won kiwa dang em ha ka Niam Tynre ki yoh myntoi ki du kawi ka (One Benefit) ya ki Scholarship yong ki. Kiwa da kylla Christan, ki ye ki wow jied yow yaleh (Apply) da ka Minority Scholarship wa ki man ki ki Minority ha ri India lane da ka Schedule Tribe Scholarship yong ka sorkar kawa da ye u Apply lut da waroh salonsar da kiwon kiwon ki khynnah puræ khlem pynyaphær ya kiwon kiwon leh lada em ki ya ka ST Certificate. Na ini i daw wa kitu won kiwa dang man Niam Tynre ki yohmyntoi ki du ya ka ST Scholarship katwa ka Minority Scholarship won ym ye ki wow yaleh neibhah wym tipmit ya ki kam ki Minority ha ri India.
Na ini i daw wym yoh myntoi ki khon ki ksu ka Niam Khasi hapoh ka Minority Scholarship, ka Seng Khasi Kmie wa ki Seiñ Raij da yaleh ki nadooh u snem 2009-10, wow yakhun wa ki paaid Khasi kiwa ksoh ya ka Niam Tynre wow yoh noh ya i tipmit na ka sorkar kam ki Minority Community. Toh u tipmit noh ya ki kam ki Minority Group ha Meghalaya khnang wow ya ryngkat lang i phoida wa kitu kiwa da em cha kiwi won ki kynhun Niam.
Lada ka sorkar Meghalaya u tipmit noh ko (Officially Recognised) ya ki Niam Khasi-Niam Tre kam ki Minority Group ha Meghalaya wei deiwa tyrwa ko ya ini i jooh cha ka sorkar India (National Commission for Minorities) kattæ daw yoh lang ar tylli ki myntoi (Double Benefits) kamwa yoh kiwa da kylla Christan. Daw yoh lang ya kitu ki Scheme sorkar kam ki Schedule Tribe wa Minority Group wa da tipmit da ka sorkar India. Wei kamni ym em de iwon iwon i yaphær hapyrdi ki Khasi-Jaintia kiwa da kylla Niam chawi wa kiwa dang ksoh ya ka Niam Tynre leh kamjooh.
Ini leh daw pynman ko wa kiwa dang em hapoh ki Niam Tynre wow em ki mar ryngkat wa kiwi ha i yoh myntoi na ka sorkar. Kamtæ da ong wa ka sorkar Meghalaya leh toh u pynsmat ko wow tipmit noh rap smat ya ki Niam Tynre kam ki Minority Group næ ki khian paaid ha Meghalaya neibhah ki da kylla khian paad sakhiat ki yow lait u chah tyllep pathan pyn hapoh ka ri hi ha ka leh niam leh rukom (Practice) wa i pynneh pynsah wei tyngkai ya ka niam ka rukom wa ka riti ka dustur yong ka jaitbru Ynñiaw Trep Ynñiaw Wasa.
