U Chairman & Managing Director (CMD) ka MeECL da pyntip u wa ki paidbah hap ki wow khana hadooh katwon emkaam wei pynemkaam bordiñ ki kawa tip kam ka Contract Load lane Contract Demand katkam ka aiñ Indian Electricity Act, 2003 wa ka MSERC Electricity Supply Code Regulation, 2018 Clause 10.1(11) kawa ong wa kiwa pynemkaam bordiñ toh u pynemkaam ki thij katkam wa da khana ki wa toh u pynemkaam ki wei kiwa pynemkaam palat daw chah ah ki yei bordiñ.
U CMD da pyntip u wa cha kiwi ki bynta ka ri kiwa pynemkaam bordiñ palat yeiwa ong ki wa emkaam ki da chah daiñ kuna ki heiwa ya i pynemkaam bordiñ da kheiñ da ka kW iwa mut wa lada pynboon ya ki tiar ki tar wa pynemkaam bordiñ kiwa baam chiboon i bordiñ naka Contract Load/Demand kawa da dep ya soi toh u pyntip chwa yeiwa pynkylla.
Da pyntip u leh wa hadooh katni, da em 3,19,413 tylli wa kynthup ya 58,828 tylli ki yung wa em ha Shillong kiwa da chim bordiñ deiwa chim da ka 1 kW lane hapoh ka 1kW heiwa da em kiwa chim duna hadooh 0.2kW wei ini ym ye u man hawa kheiñ yei rukom pynemkaam bordiñ hapoh ka jylla heiwa ha Ri-loom Khasi Jaiñtia toh kiwa pynemkaam Heater katwa ha Ri-loom Garo da pynemkaam ki ya ki Air Conditioner.
Ya i pynemkaam bordiñ ha yung toh kiwa nadooh 1kW hadooh 25kW. Da ka 1kW ye u pynemkaam du kawi ka Heater wa 1000 Watt lane 10 tylli ki Incandescent Bulb (ki jiat warim ki Bulb) wei ym em de iyi iyi. Lada pynemkaam won ya ka Air Conditioner kawa khlan bor 1 Ton, ka pynemkaam bordiñ toh u chim da ka 3.5kW.
Kamtæ u CMD da ong u wa ini waroh da toh wow pynkylla 20-30 snem nachwa heiwa hadooh ki yung kiwa heh wa heh leh chim ki ya ka bordiñ wa khian tangwa pynemkaam ki palat yeiwa toh u pynemkaam ki.
Da ong leh wa lada kini waroh kiwa pynemkaam bordiñ chim ki da ka 5kW Load Connection, ka MeECL daw yoh ko hadooh T. 206 klur ha u snem wa nyngkong du na ka Security Deposit wa sa 92 klur na ka Fixed Charges.
Da kdaw u leh wa em ki dukan namo ki Commercial Consumers kiwa pyndait bordiñ da ka 1kW iwa man pyrchah ya ka aiñ. Wei i ku i pynmih poisa ka MeECL daw man ko ar chah lada pynemkaam ki da ka 5kW. Wei kini ki kaam kam kini toh kiwa da ktah bha ya ka Corporation da boon snem wei lyngba ki Smart Meter daw ye u chem thij hadooh katwon pynemkaam bordiñ ki bru wei lada pynemkaam ki palat yeiwa ong ki wa pynemkaam ki.
Neidaw wa ini toh i tkoh yong ka Corporation, kamtæ da maap ya i warim wei neiliang ka MePDCL da e laad ko ya waroh nadooh ki yung ki bru samen, ki dukan, ki chnat sorkar wow wan ki chakhmat yow pynbait hadooh katwon emkaam bordiñ ki deiwa lai ha ki jar jiar ki Assistant Executive Engineer yow pyndap yaka Self Declaration Form kawa khana katwon tylli ki Bulb, ki TV, ki Heater wa kiwi kiwi wa pynemkaam ki la ha yung næ thaw kreh.
Ya ini toh u leh hapoh chi bnai nadooh ka 15 tarik uni u bnai wei hadien wa kheiñ katwon emkaam bordiñ, daw pyntip cha kiwa pynemkaam bordiñ wow su ki yaka Security Deposit lada hap pynku ya ka bor i bordiñ.
Hadien ini i chi bnai, ka MePDCL daw chim ko yei bor wow phah Notice yow su yaka Additional Security Deposit deiwa kheiñ katkam i pynemkaam bordiñ ha ki 12 bnai wa da dep wei ya kiwa ym leh ya ini daw pynchitom katkam ka aiñ.
Ya ini u leh ya waroh nadooh kiwa pynemkaam 2kW, 3kW, 4kW, 5kW yow chem yei sakhiat hadooh katwon pynemkaam Load ki.
