Shillong: U Seilenthang Lotjem da yoh u yaka Hat-trick yaka Punjab yow pynrem yaka Manipur da 3-0 haka Group B ka Hero Junior National Football Championship ka Dr. BC Roy Trophy ha Third Ground, Shillong ynne ka sngi.
U Lotjem da thap u haka minit wa 9, 34 wa 49 yow man waroh 5 tylli ki kool wa da thap u ha kani ka lympung hadien wa thap u ar kool haka yalehke wa nyngkong ka Punjab. Ka Punjab kattu da em ko ha khlieh kani ka Group deiwa yoh waroh 6 Point na ki artylli ki yalehke. Ka Manipur da kut ki laad ko hadien wa rem ko ha waroh ki yalehke wa da yaleh ko.
Ka Kerala won da jop ko da 2-1 yaka Jharkhand. U Muhammad Ajsal (12′) wa u Mohammed Aimen (64′) toh kiwa thap kool yaka Kerala, katwa u Lairenjam Sushil Singh (35′) da thap u yaka Jharkhand. Kattu ka Kerala waka Jharkhand da yoh ki mar 3 Point.
Haka Group D, ka West Bengal waka Chhattisgarh da kut ka yalehke da 0-0. Ka Karnataka won da lai ko cha khlieh kani ka Group deiwa jop 5-0 yaka Jammu & Kashmir. Ka Karnataka da yoh ko yaka kool wa nyngkong da ka kool wa thap bakla da uwa yalehke ka J&K haka minit wa 29 wei da thap won da u Aditya Mohan (33′), Godwin Johnson (46′), Elangbam Tondon Meitei (54′) wa u Shreyas Ketkar (82′ Penalty).
Mynstep ki yalehke toh haka Group A wa C. Heiwa haka Group C, ka Meghalaya da em ko ha khlieh deiwa kheiñ yaka Goal Difference yaka Haryana (+6 la +2) wei waroh arliang daw yooluti ki yei jop deiwa biang yow yoh ki u psiah Semi Final.
Ka Meghalaya daw yachem ko yaka Sports Authority of India (SAI) haka Third Ground wei ka SAI daw emlaad ko wow psiah Semi lada jop ki wei lada ka Haryana ym ye ko u pynrem yaka Odisha.
Haka Group A, ka Uttar Pradesh kawa em ha khlieh kani ka Group daw yachem ko ya kawa em ha i wa ar, ka Mizoram. Waroh arliang da em ki mar 4 Point wei kiwa jop daw yoh ki wow psiah Semi Final. Lada ym em won wa jop, ka Goa jop ko yaka Delhi, ka UP, Mizoram waka Goa daw yoh ki mar 5 Point wei daw hap kheiñ daka Goal Difference.
Ki yalehke mynstep:
Group A (9:30am) – Mizoram vs Uttar Pradesh (Third Ground); Goa vs Delhi (JN Stadium)
Group C (2:00pm) – Sports Authority of India vs Meghalaya (Third Ground); Odisha vs Haryana (JN Stadium)
Discussion about this post