Shillong: Ka Meghalaya daw yachem ko waka Mizoram haka Semi Final wa nyngkong ka Hero Junior National Football Championship haka Dr. BC Roy Trophy hadien wa waroh arliang da yoh nyngkong ki ha ki jar jiar ki Group yong ki ynne ka sngi.
Ka Mizoram da man ko ka liang wa nyngkong wa psiah Semi Final deiwa khyrwait yaka Uttar Pradesh da 5-0 haka Third Ground ynne i step. Ha i sngi won ka Meghalaya da jop ko yaka Sports Authority of India da 2-0.
Ka Meghalaya da thap ko ya waroh artylli ki kool yong ka haka kylla miet lyngba u Wadajied Kynsai Ryngkhlem haka minit wa 73 wa 82 yow pynpoi ya waroh ki kool wa thap u 5 tylli ha kani ka lympung yaleh bol.
Haka Group C, ka Haryana da wan ko nadien yow jop yaka Odisha kawa yalehke da 10 ngut da 3-2. Ini mut ka Meghalaya waka Haryana da yoh ki i jooh i Point tangwa ka Meghalaya da yoh ko wow ku cha khlieh deiwa kheiñ yaka Goal Difference (+8 la +3).
Haka Group A, u Lalrintluanga da yoh Hat-trick u (29′, 63′, 82′) yaka Mizoram, katwa u Lalpekhlua Jongte (32′) wa u Gratus Lalneihliana (60′) da yoh ki mar chi kool yow jop yaka UP. Ha kawi won ka yalehke ka Goup A, ka Goa da jop ko yaka Delhi da 1-0 yow yoh wa ar ha kani ka Group, wei da lai liwan yung smat ki deilang ka Delhi waka UP. U Pratik Naik da thap u yaka chi kool haka minit wa 37.
Ki yalehke mynstep:
Group B (9:30am) – Punjab vs Jharkhand (Third Ground); Kerala vs Manipur (JN Stadium)
Group D – (2:00pm) – West Bengal vs Karnataka (Third Ground); Jammu & Kashmir vs Chhattisgarh (JN Stadium)
Discussion about this post