Shillong: Ka Meghalaya da jop ko da 6-0 yaka Odisha haka sngi wa le ka Junior National Football Championship ka Dr. BC Roy Trophy yow poi cha khlieh ka Group C ynne ka sngi.
U Wadajied Kynsai Ryngkhlem da thap u yaka Hat-trick wa nyngkong kani ka lympung yalehbol. U Henryford Nongneng, u Gladdy Kharbuli wa u Ioannis Suchen toh kiwi kiwa da yoh u thap kool.
Hadien wa ka Meghalaya ym em yoh ko wow thap kool pyrchah yaka Haryana haka 28 tarik, ynne won u Ryngkhlem da thap kool nyngkong u pyn hawa minit wa sdang ka yalehke.
Kani ka kool da neh ko hadooh wa kut ka kylla step tangwa mar ya sdang ka kylla miet, u Ryngkhlem da thap biang u haka minit wa 48, pynbood sa u Nongneng haka minit wa 69 katwa u Captain u Kharbuli da thap u haka minit wa 81.
U Suchen da thap u yaka kool wa 5 katwa u Ryngkhlem da thap u yaka Hat-trick haka minit wa 88.
Ka Haryana won da jop ko da 2-0 yaka Sports Authority of India da ki kool na u Nadeem (39′) wa u Vikas (44′).
Ka Haryana kattu da yoh ko 4 Point, ka SAI 3 Point waka Meghalaya leh 4 Point tangwa da yoh nyngkong ki haka Group C deiwa kheiñ yaka Goal Difference deiwa yoh +6 yaka Haryana +2.
Haka Group A, ka Goa da pynsepai ko ya ki artylli ki kool wa da thap chwa ko heiwa da kut ka yalehke da 2-2 pyrchah yaka Uttar Pradesh ha JN Stadium. U Velroy Cardozo (19′) wa u Macbon Valen Fernandes (48′) da pyntam ki yaka Goa tangwa ka UP da yakhun ko lyngba u Himanshurai (50′ penalty) wa u Mohammad Taushif (54′). Ka UP kattu da em ko 4 Point katwa ka Goa da em ko 2 Point.
Ka Mizoram won da pyntam ko da 2 kool hapoh 15 minit lyngba u FC Pahnai (8′) wa u Lalpekhlua Jongte (14′), tangwa ka Delhi da ye ko wow su kylliang chi kool haka minit wa 75 da ka Penalty wa chim u Fahad Temuri tangwa ka Mizoram ym em de chah thap kool ko yow yoh ko yei jop wa nyngkong wei kattu da yoh ko 4 Point.
Ki yalehke mynstep:
Group B (Third Ground) – Kerala vs Jharkhand (9:30am); Manipur vs Punjab (2:00pm)
Group D (JN Stadium) – Jammu & Kashmir vs Karnataka (9:30am); Chhattisgarh vs West Bengal (2:00pm)
Discussion about this post