Du 1397 tylli ki Trading License wa e ka JHADC, dawa ka AJYWO wow khang ya ki dukan wa ym em

Jowai: Hadien wa yoh yutip ka AJYWO Central Body lyngba ka RTI hajrong i em Trading License wa poi du 1397 tylli ha ri-loom Jaiñtia, kiwa kynthup ya ki jait khayi-pateiñ waphær waphær, ka seiñ da dawa joor ko naka JHADC wa toh u khang noh ya ki dukan ki baar jylla ki wym em Trading License khnang wow elaad ya ki bru yong i wow sdang noh ki da ki yong ki hi ki laad kamai kajih.

U M H Dkhar, President yong ka AJYWO Central Body, da ong u wa i wym ye ka JHADC wow pynkrehkaam pura ya ka aiñ “The Jaintia Hills Autonomous District (Trading by Non-Tribals) Regulation (Act)-2011, da pynman ko ya kiwa na baar jylla wow wan ku kam ki ngap cha ri-loom Jaiñtia neidaw wa ka laad kamai kajih heini suk bha ko wa ym emkaam wow bood ya ki kyndon ka aiñ.

Kam wow pynkynmoo, ha ka 26-11-2018, ka AJYWO, hadien wa ka chem ko lyngba ka RTI wa i pynkrehkaam ya ka Trading License ha ri-loom Jaiñtia, ym em lai bait ko, ka seiñ da lai yachem ko wa u CEM warim yong ka JHADC deiwa e lang ya ka dorkhat wei da dawa joor na oo wow pynkrehkaam pura ya ka aiñ Trading License wa Non-Tribal Employees’ Service License ha ka ri-loom Jaiñtia, wei ym toh u dai roi ya ki Trading License khnang wow elaad ya ki bru yong i wow sdang hi noh ya ki laad kamai kajih kiwa ki ye ki wow leh.

Katkam ka yutip wa da yoh lyngba ka RTI, kiwa em Trading License hapoh ri-loom Jaiñtia, ha Ladrymbai em 508 tylli, ha Khliehriat em 387 tylli, ha Jowai em 257 tylli, kiwa dai rood sarok namo ki Hawkers em ki 42 ngut, Coal/Cement 48, Umkiang 33, Dkhiah 38, Mynkre 20, Sookilo 17, Thangskai 12, Nongsning 8, Jalaphet 5, Moopala 4, Byndihati 2, Chiehruphi 6, Tongseng 10. Waroh da poi 1397 tylli. Kamtæ ka seiñ da ong ko wa ini i em ki Trading License toh kawa ym ye u pdiang hawa pait cha ki yaaw ki haat boon sa du ki dukan ki baar jylla.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U M H Dkhar da ong chooh chooh u, “Ka JHADC man ko kawa tlot palat, ki Executive Committee waphær ym ye ki u pynkhor hajrong ka Trading License wei na ini i daw da roi ki baar jylla kiwa wan seiñ khih katwa kwah hi eh ki kawa man leh ka dooh nong kawa khroo bha ya ka JHADC iwa booh leh ya ka ri wa ka jaitbru hei ma wa khroo bha lada ka JHADC ym khyrngiat yong bru ko wei ym slem de ka kylla daw man ko kam ka jylla Tripura”.