Ynne kawa man ka sngi sdang ka dorbar yung chna aiñ ka jylla kawa tip leh kam ka Meghalaya Legislative Assembly Autumn Session, neiliang ka Liang Pyrchah da dawa ko wow pyntam sngi neidaw wa da tbian ware iwa du 5 sngi neibhah wa em chiboon ki kaam wa emkaam u yaklam hapoh ka yung dorbar.
Neiliang u Adelbert Nongrum, MLA ka North Shillong da wanrah u ya ka Motion yow pynkylla yei pynbait sngi pynman ya kani ka dorbar wei da yieñ u leh wow klam deiwa ong 5 sngi donhi u pynman dorbar toh iwa tbian ware neibhah kam ini da yoh u chong dorbar du ar sien donhi chi snem wei na kini ki 5 sngi da e por du 2 sngi kam ki “Private Members Business” neibhah katni em boon ki kaam wa chon bha wa emkaam u yaklam.
Da e nongmuna u yei hiar kyrdan ka jylla heiyatoh waka puræ puthi, i yoh i kot katkam wa da pynbna ini wa dep, i roi i pynemkaam drugs, ki kaam wa yatoh waka National Education Policy, i wym yoh khih yoh kreh ki khynroo khyllood, i wym biang i rukom pynkrehkaam ya ka State Quota ya kiwa lai puræ MBBS, i wym biang i rukom pynlai ya ka Public Hearing ha East Jaiñtia Hills, i leh embor ki pulit pyrchah ya ki bru wa yakhih, neiwon yoh poisa wow pynman ya ka Cherry Blossom Festival wa kiwi kiwi de, wei kammon u ye u yaklam ya ini waroh du hapoh 5 sngi wei ini waroh toh i tynyap ya ka riti synchaar paidbah.
Neiliang u Ardent M Basaiawmoit, MLA ka Nongkrem leh da mynjur u wa 5 sngi toh iwa duna palat wei da ong u wa hawa phah ya ki yukylli cha ka sorkar da jied ko wow jubab 60 tylli wei du oo samen da dep phah u 20 tylli wei boi na kitæ daw yoh u yaklam yatai du iwi donhi na iwa phah u wei bha lada pynboon sngi wei pynjrong leh yei por ha ki sngi wa pynman dorbar.
Hawa e yei jubab, neiliang u Prestone Tynsong uwa pait ya ka chnat Parliamentary Affairs da ong u wa ha kini ki 5 sngi lada emkaam ye wow pynjrong ya ka dorbar da 2-3 kynta katkam i rai u Lamphang wei da mynjur u leh wa waroh ki phang wa kwah ki liang pyrchah u yaklam toh kiwa emkaam bha.
Da e daw u leh wa em ki por yei jooh ki phang da wanrah boonsien da kiwa boon ki MLA, kamtæ emkaam ki wow chong yaklam chwa yow lait u hap u jubab yei jooh chi jooh.
Hadien ini neiliang u Adelbert da pyndam noh u ya ka Motion deiwa ong wa lada bien wow pynjrong yei por wa pynman dorbar.
Kamtæ da rai da ka yung dorbar wow lai chakhmat katkam ki sngi wa da dep pynbait wei da pynkut ya ka ynne ka sngi heipor chiteiñ sngi wei daw pteiñ biang ha ka 19 tarik.
Discussion about this post