U Montri Rangbah ka Assam, u Himanta Biswa Sarma ynne da ong u wa em du 8 ngut ki bru kiwa da pyndap pyrtuid wow man tre ri katkam ka Citizenship Amendment Act (CAA) hapoh ka jylla hadien soo bnai wa pynbna ya ki kyndon krehkaam namo ki Rules yong kani ka aiñ.
Da beiñ u leh ya kiwa pyrchah CAA wa kiwa yahkhmat yei yakhih kiwa da pyntieñ paidbah deiwa ong wa daw em hadooh 50 lak ngut kiwa psiah tooh (Illegal Immigrants) kiwa ye wow man tre ri katkam kani ka aiñ.
Chooh chooh da ong u wa i man tre ri man ko ka phang wa emkaam bha ha Assam heiwa ha u 2019 da em san ngut wa yap kiwa yakhih pyrchah CAA hapoh ka jylla.
Kam wow pynkynmoo heini wa ka sorkar India da pynkylla ko ya aiñ CAA ha u 2019 heiwa ki Hindu, Parsi, Sikh, Buddhist, Jain wa Christan kiwa yut na ki ri Muslim kam na Afghanistan, Bangladesh wa Pakistan chwa ka 31 Kmaichobglad (Dec) 2014 ye ki wow pyndap wow man kam ki tre ri ha India.
Ka Assam em ko chiboon ki Bengali Hindu kiwa da yut cha kani ka jylla ha ki phaw snem wa dadep heiwa da sakhi leh yei psiah kiwa boon ki Bengali Muslim na Bangladesh.
Discussion about this post