I dooh thaw puræ ki khynnah ha ka Class XI kiwa em kamwa 149 ngut na kylleiñ ka Ri-loom Jaiñtia da wanrah i yei sñiawkhia na ki manbei manpa, ki seiñbhalang wa ki bor sorkar leh kamjooh.
Ini da pynbor i ya ka sorkar wa lyngba ka chnat puræ puthi wow sdang noh ya ka Morning Section ha Government Boys Higher Secondary School nadooh ka 16 tarik uni u bnai heiwa da booh leh ya ka 26 tarik kam ka sngi wa khaddooh wow pdiang ya ki Form kiwa thooh thaw puræ.
Ha waroh da em 89 ngut ki khynnah wa wan chim ya ki Form wei kiwa da ekti (Submit) ya ki Form wei kiwa da su ya ka bai lai puræ da em ki 82 ngut.
Ki Class neibynta kini ki khynnah u sdang ko nadooh mynstep ka 1 Kmaichonglad.
Kam wow pynkynmoo wa boon kini ki khynnah leh da mih ki cha sarok wow yakhih deilang wa ki seiñbhalang wei kamwa da yoo heini da em 67 ngut ki wym bien u chim kabu ya ini iwa da yarap ka sorkar.
Puræ leh: E por ka JYF hapoh 10 tarik wow pynyoh thaw puræ ya kiwa lai Class-XI
