Jowai: Ki yakhun Semi Final ka Inter School Football Tournament wa dang sah da pyndep ya ki ynne ka sngi.
Heipor 9 waje i step ka yakhun wa nyngkong ha ka kyrdan Under-17 Girls ha pyrdi ka Govt. Girsl HS School waka Riwar Jaiñtia Church of God da rai ya kiwa jop da ka yachut Tie-breaker hadien wa kut ka yalehke mar chi kool.
Ha ka yachut Tie-breaker ka Govt. Girls da jop ko da 2-1.
Ha ka Semi Final wa bood ha ka jooh ka kyrdan, da rai biang ya kiwa jop da ka yachut Tie-breaker ha pyrdi ka Moodymmai Secondary School waka St. Dominic HS School.
Hadooh wa kut i por ym em wa yoh u thap kool kamtæ ha ka Tie-breaker ka St. Dominic da jop ko da 4-2.
Ha ka kyrdan Under-17 Boys won, ka Little Flower, Ummulong da pynrem ko ya ka Jowai Presbyterian Higher Secondary School da ka yachut Tie-breaker biang hadien wa ym em wa yoh u thap kool.
Ha ka yachut Tie-breaker ka Little Flower da jop ko da 3-2.
Ka Semi Final wa khaddooh da pynman ha pyrdi ka North Liberty pyrchah ya ka St. Dominic wei ha kani ka yakhun leh da pynkut da ka yachut Tie-breaker.
Hadooh wa kut i por yalehke, pynar da yoh ki u thap mar chi kool. Ha ka yachut Tie-breaker won ka North Liberty da jop ko da 3-2.
Ki yakhun Final u pynman ha ka 12 tarik uni u bnai wei ki yakhun u man ki kamni ha wah:
Heipor 9 waje i step ha ka kyrdan Under-17 Girls ka Government Girls’ HS School u yachem ko wa ka St. Dominic HS School.
Heipor 10:30 waje i step ha ka kyrdan Under-14 Boys ka Marian Hill HS School u yachem ko wa ka Govt. Boys’ HS School.
Heipor 12 waje pyrdi sngi ha ka kyrdan Under-17 Boys ka North Liberty u yachem ko wa ka Little Flower School, Ummulong.
Discussion about this post