Ka ‘Open Hearing & Camp Sitting’ yong ka National Human Rights Commission (NHRC) wa pynman ha Shillong da yaklam ko leh heiyatoh wa i tih mooyong pyrchah ya ka aiñ hapoh Meghalaya.
“Ka Commission da wanrah ko ya ini neidaw manda em ka tih mooyong pyrchah ya ka aiñ, ini ym mut wa emkti du ki kattu katni ngut hadooh wow ye u lait u yoo da ki khmat kiwa em hei bor. Kamtæ iyi i daw wa da chah u pteiñ i tih mooyong pyrchah ya ka aiñ kamni?” da kylli uwi na ki dkhot ka NHRC.
Neiliiang ka sorkar kawa da phah ya ki bru yong ka cha kani ka yalang, da pdiang ki wa yow ye u leh yeini emkaam wow emkti kiwa boon ki chnat sorkar kamtæ ye u em i tkoh i duna heini heitai.
Ka Commission da ong ko wa lada i tih mooyong man ko pyrchah ya ka aiñ, manda dai lilam iwa yoh na ini toh u lai ko cha ka jylla.
“Lym kamtæ kiwa tih mooyong pyrchah ya ka aiñ da pynkrehkaam ki leh pyrchah ya ka aiñ ya kiwa khih mylla. Ini mut wa waroh kawi ka aiñ da chah tyngkheiñ. Nga sñiaw O wa ki bor sorkar leh ngait ki wa da emkaam wow ya krehlang kiwa boon ki chnat yow wanrah ya iwa emkaam yow khanglaad yeini i tih mooyong pyrchah ya ka aiñ. Chisien wa sdang ka tih mooyong deiwa yoh License te da pyntikna wa kiwa khih mylla leh daw yoh ki yei yada hapoh ka aiñ kamjooh leh hei rukom kreh,” da ong u dkhot ka Commission.
Ka NHRC da chim ko leh ya ki ar tylli iwa jia wa yap kiwa khih mylla ha ki paar mooyong wa pyrchah ya ka aiñ hapoh ka jylla.
“Ha iwi wa jia da em 6 ngut kiwa mylla wa yap katwa ha kawi da em 5 ngut kiwa yap hadien wa chlai um ka krem mooyong,” da ong u dkhot ka Commission, u M. M. Kumar hawa yaklam wa kiwa thoh khubor.
Katkam i ong u Kumar, ki heh ka sorkar Meghalaya da pyntip ki cha ka NHRC wa da su T. 5 lak cha kiwa hayung kiwa yap kiwa da ye u tipmit.
Ha kani ka chong bichaar, ka NHRC da pyntip ko wa da em ki seiñ kiwa da wan wow yaklam hajrong i hok wow yoh baam wa iwa yatoh wow pynyabi ya u Adhaar waka Ration Card.
Katkam wa ong kini ki seiñ da ong ki wa ini toh i wym bha neidaw wym biang ka Internet.
“Ka rukum saam rachon namo ka Public Distribution System (PDS) toh kawa da pynkrehkaam hapoh ka jylla da ki bor sorkar yow pyntikna wa ym em kiwa dooh yei bhah yong ki tangwa ki seiñ da kyntait ko ya ini kamtæ da phah ya ka sorkar jylla wow e jubab hajrong ini,” da ong u Kumar.
Puræ leh: Pynman ka NHRC ya ka Open Hearing hajrong ki hok longbru manbru
