Ka District Road Safety Committee wa kynthup ya ka Transport Department, ka District Commissioner Office, West Jaiñtia Hills, Health Department, Social Welfare Department wa kiwi kiwi da pynman ki ya ka Road Safety & Awareness Programme ha Amlarem heiwa u Asst. Commissioner, Dr. K. Rabha da man u kam u kongsan.
Kiwa klam da khana ki yei emkaam u chngaaiñ ki sarok heiwa u PWD Executive Engineer, u R. Daw da kyntu ki ya ki paidbah wow man kiwa syndong wei wow bood ya ki kyndon aiñ katwa u In-charge ka Amlarem Police Station, u D. Lamare da ban joor u yei emkaam u sap Helmet wei u pyndait Seatbelt, heiwa du ha u 2024 em hadooh 1,80,000 ngut kiwa yap nei tyrrah kari hapoh ka ri.
U SDMHO, u Dr. A. Khonglah da klam u hajrong ka Good Samaritans namo ki bru wa yarap ya kiwi kiwa emkaam yarap wei wow khang u dih duma hapoh ki thaw paidbah wa ki kari kamai.
Ka Social Welfare Counsellor, ka K. Pariat da pynche ko hajrong ka HIV/AIDS heiwa da pynchlur ko wow lai thooh dawai hawa em ki Health Camp.
Ka Jowai–Amlarem Sumo Tourist Association da kyntu ko yei yakrehlang wei wow khang ya kiwa kamai wow kit palat pood ki ya ki bru.
U Waheh Chnong ka Amlarem, u K. Pohlong da kyntu u ya waroh wow kiar na ki kaam wa man pyrchah aiñ.
Neiliang u District Transport Officer, u E. Lyngdoh da maham u ya kiwa kamai khlem Permit heiwa ye ki u chah pynchitom hapoh ka aiñ Motor Vehicles Act.
Ka Breakthrough Rehabilitation Centre da pynyoo rong ko ya i dam skur neidaw wa pynemkaam drugs.
Ya ki kyntien khublei da yoh na u A. Rymbai.
Discussion about this post