Jowai : Ya u sarok wa dang dep siang psiang da ka tnat PWD Jowai North Division, ym duna san bnai da sih dur wot u katni neibhah u sarok da sdang khoh wot u.
Neiliang ka seiñ Khasi Jaiñtia National Union (KJNU) Saba Unit hawa chem ko yeini i kreh habra kani ka tnat lyngba u Contractor yong ka, da dawa ko wow chna pynmiat noh ya uni u sarok sa chisien uwa lai lyngba chiboon tylli ki chnong uwa jrong kamwa 35 kilometer nadooh Nongkynrih hadooh wa poi ka chnong Barato.
Neiliang ka seiñ da kynnoh ko wa ini i chna tang dep, khlem kreh bha neibynta i emkaam ki paidbah ya uni u sarok u wa man kam u budloom yong ka thaiñ, uwa nadooh nachwa man u uwa sih uwa da pynchitom ki paidbah kiwa pynemkaam ya oo.
Kamtæ ka seiñ dawa joor ko na ka tnat wa pait ya uni u sarok wow phah chna pynmiat ya oo chwa wow slem i por.
Kani toh katkam ka khubor na u President ka KJNU Saba Unit u Andreas Suchiang.
Discussion about this post