Ka mukotduma PIL heiyatoh wa ki karkhana Coke wa krehkaam pyrchah ya ka aiñ khamtam ha West Khasi Hills District da chong bichaar biang ka ynnin ka sngi heiwa uwa yaleh mukotduma da kam u wa dang em boon kini ki karkhana kiwa krehkaam khlem da yoh bor.
Da kam u leh wa u mooyong wa tih pyrchah ya ka aiñ dapoi u cha kini ki karkhana wa krehkaam pyrchah ya ka aiñ, kamtæ da phah wow pynsakhiat ya ini wei lada emkti lang leh ki heh pulit khamtam ha Shallang kiwa chah wow lai ki Truck wa kit mooyong pyrchah aiñ wow poi ki cha kini ki karkhana.
Neiliang ka sorkar jylla da kwah ko wa ya ini i kaam toh u bichaar lang hapoh ka mukotduma wa da yaleh da ka High Court hi heiyatoh wa i tih wei kit mooyong pyrchah ya ka aiñ kawa daw chong bichaar ha ka tayaaw wow wan.
Kamtæ ka yung bichaar da ong ko wa i rukom leh ka sorkar toh yow pynslem donhi deiwa yooluti wa daw em i wow jia tangwa yow khanglaad ya kini ki kaam pyrchah aiñ ymem leh ki tang kajiak leh.
Kam wow pynkynmoo wa ka mukotduma wa da yaleh da ka High Court hi toh hajrong i pynkrehkaam ya ki hukum ka NGT deilang waka Supreme Court wei da thung ya u Justice B.P. Katakey (Rtd) yow pyntikna wa waroh u mooyong wa da dep tih toh u dai noh oo, da phah leh ya oo wow pait u ya ini i kit ya u mooyong cha kini ki karkhana Coke.
Da e bor leh ya oo wow pait u yei wym bien ki bor District, ki pulit u leh yei kaam yong ki kamjooh yeiwa leh bakla ki iwa kynthup ya u OC ka Shallang Police Station.
Ya kani ka mukotduma u chong bichaar biang ha ka 03-07-23.
