Ka Ministry of Culture ka sorkar India lyngba ka Sangeet Natak Akademi, New Delhi (National Academy of Music Dance and Drama) kawa man leh ka Autonomous Body yong ka Ministry of Culture ka sorkar India, chirup i krehlang waka Navodaya Vidyalaya Samiti, kawa man ka Autonomous Body wa haap hapoh ka Ministry of Education ka sorkar India, da pynman ko ya ka “Kala Dharohar” wa ar sngi ha ka 2 wa 3 tarik uni u bnai lyngba ka Workshop wa i sikai rwai Meera Bhajan ha PM Shri School JNV Mukhla, West Jaiñtia Hills District.
Ka “Kala Dharohar” man ko kam chibynta wow kyrchaan ya ka National Education Policy deiwa em kiwa pynyoo dei rwai, i chaad, em kiwa pynman da ki kynja e sikai waphær waphær da ki bru wa bna naam ha ki jait kaam wa boon jait.
Kamtæ ha PM Shri School JNV Mukhla da wan wow e i sikai rwai Meera Bhajan da u Jiten Basumatary, Vocal Artist deilang u DibyaJyoti Sangmai uwa chimbynta wow choh Tabla waka Jonali Ojha Basumatary kawa chimbynta u tem ya ka Tanpura.
U Principal ka JNV Mukhla, u N. Kumar hei klam yong oo ong u ya kani ka “Kala Dharohar” wa ar sngi da pynman leh kam chibynta i kynmoo warom ya ka lyngkhooh sngikha wa 525 ka Sant Mirabai.
Da ong u leh wa man ki kiwa embhah tam wow yoh ya kani ka Kala Dharohar neibhah wym em e cha waroh ki skur tangwa du ka skur JNV Mukhla donhi wa yoh hapoh ka jylla Meghalaya.
Kamtæ hajrong i chah jied kani donhi ka skur, u Principal JNV da e khublei u ya waroh ki khynnah skur deiwa ong ini waroh jia i toh lyngba i sap i phong, i chemphang ki khynnah puræ kani hi ka skur neiwa pteiñ ki u chimbynta ha ki jait yakob waphær waphær wym toh du kat hapoh ka PM Shri tangwa wot ha ka District wa ka State.
Ka Dr. Pratibha Sarma, Project Director Satriya Kendra, Guwahati Sangeet Natak Academy hawa klam ha kani ka sngi ong ko ha u bnai wow wan daw kynmoo warom ya ka lyngkhooh sngikha wa 525 ka Sant Mirabai, kamtæ ka sorkar India daw pynman ko ya kam kani ka lehkmen ha waroh kawi ka ri deiwa pynman ki Workshop, Seminar, i rwai, i chaad wa kiwi.
Wei ha waroh kawi ka ri da pynkreh wow leh ha ki 100 tylli ki skur, ki College wa ki University heiwa daw sikai ya ki khynnah hajrong ka Sant Mirabai iwa ye u man la hei dur i rwai, i chaad næ Seminar.
Pyntip ko leh waka Sant Mirabai toh kawa da thoh hadooh 1400 spah tylli ki Poem wa boon tylli ki kot, kamtæ kani man ko ka laad ka kabu ya i wow tip hajrong yong ka.
Neiliang u SK Lato, Vice President Rotary Club Jowai uwa da emlang kam u kongsan, booh u i kyntu ya ki khynnah skur wow chim kabu yei sikai wa yoh ki ha kini ki ar sngi na kini ki Artist kiwa da wan wow sikai ya ki khnang wa i wan yong ki u man i wow sah kynmoo lyngba i sap i phang wa da e ki.
Discussion about this post