U Montri wa pait ya ka chnat puræ puthi ka jylla, u Lahkmen Rymbui da ong u wa hadien wa ka National Testing Agency (NTA) da pynbna ko wow pynman noh da ka Common University Entrance Test (CUET) neibynta ki khynnah yow yoh lai puræ ha ki College wa da tipmit da kdoh ktien wa ki University yong ka sorkar pyrdi (Central University), neiliang ka sorkar jylla da yaklam ko boonsien wa ka sorkar pyrdi wow pynlait ya ka Meghalaya na ka CUET.
Da ong u wa i yachem wa u Montri Rangbah, u Conrad K Sangma ya u Montri ka chnat puræ puthi ka sorkar pyrdi, u Dharmendra Pradhan ha Delhi ynne ka sngi, da mynjur wa daw pynlait noh ya ka CUET na ki College wa da pait wei kyrchaan da ka sorkar jylla, katwa ya ki kyrdan puræ Undergraduates ha ki College wa da pynlai da ka University daw hap ki wow yakhun lyngba ka CUET, heiwa da e nongmuna u ya kiwa kwah u lai puræ “Law” wa da pynlai da ka NEHU ha kani ka jylla.
Da ong u wa i mynjur wow pynlait ya ka Meghalaya na ka CUET daw pynstiñ chiboon ya ka chnat puræ puthi ka jylla wei kamjooh ya ki khynnah, deiwa ban biang wa ka jylla ym pu man ko kawa pynkhreh neibynta kani ka Exam neibhah wa ki khynnah leh ym pu sñiawthooh sñiawthaw ki khamtam i wym biang ki Examination Center.
