Jowai : Ka Theater Club ka Thomas Jones Synod College ynnin ka miet da chimbynta ko ha ka lympung yalehke wa da pynman da ka kolej ka wa tip kam ka ‘Drama cum Variety Show’ ha District Library Auditorium, Mynthong.
Ka Theater Club ka kolej da pynyoo paidbah ko ya ka droma wa em 8 bynta (Scene) ka wa da pynwandur na ka parom tbian wa tip “The Necklace” wa thoh da u Guy de Maupassant u nong France ha u snem 1884. Da pynchna thymme ya kani ka parom yow yahap ko katkam i rukom im ki bru cha i da ka kong Pynhun Sunsngi wa u Wansalan Dhar.
I sneiñ kani ka droma toh “Ym hoi u kwah rhah i yei wym kot i bor”. Ka parom man ko chaphang ki ar ngut chi kurim ka Matilda wa u Loisel ki wa dooh tangwa ki wa kwah u im i wym yatoh kyrdan wa ki.
Ha kawi ka sngi Matilda da pan kylliang ko ya uwi u kpieñ na ka lok ko ka Jeanne yow yoh ko u deiñ cha ka wi ka party tangwa sih bhah ko wa wiar noh uni u kpieñ. Kamtæ kini ki ar ngut chi kurim da dai lut ki katwa em ki yow thied salan da uwi u kpieñ. Hadien 10 snem da chem biang ka Jeanne ya ka Matilda ha i dooh i duk. Heini ka Matilda da khana ko ya ka Jeanne ya waroh i wa da jia. Ka Jeanne da sniaw phylla ko yei parom ka Matilda da khana ko wa u kpieñ wa e ko u deiñ ym toh u wa dei ksiar wa ki moolangnai paka tangwa u wa thied toh dor.
Ki nongak ha kani ka droma toh u Pyniowdame Syngkon kam u Loise, ka Dakaruchwa Ryngkhlem kam ka Matilda wa ka Naisaka Rymbai kam ka Jeanne.
Ya kani ka yalehke ki khynnah ka kolej da pynman kam chibynta wow yoh lad ki khynnah kolej u pynyoo paidbah ya ki sap rwai, chaad wa i sap ak droma. Wei da man ko leh ka sien nyngkong wa pynman ka kolej ha ki thaw paidbah kam ya kani ka yalehke.
Kamjooh ka poisa wa mih na i dai ya ki tiket ha kani ka sngi u lai ko cha ka yarong poisa ka kolej.
Ya kani ka yelehke da wai da u principal ka kolej u Dr. R. Kharkongor deiwa emlang ka kong P. War ka wa man kam ka convener ha kani ka sngi.
Nalor kani ka droma ha kani ka sngi da em leh ki dhab tem ka Jowai The Lynx kiwa dang dep wan yachimbynta ha ka Hornbill International Rock Contest 2015. Wa ki nongrwai wa ki nong chad kani ka kolej ki wa pynwyrngai ya ki paidbah.
Discussion about this post