U Montri Rangbah ka jylla, u Conrad Sangma hawa e yei jubab ynne hadien wa dep kiwi ki MLA u klam heiyatoh wa ka mang tyngka, da ong u wa ha ki snem wa da lai nadooh u 2017-18 hadooh u 2024-25 da ku ka mang tyngka le chah iwa na Rs. 9,858 klur chadooh Rs. 27.072 klur.
Ha kani ka jooh ka por, da ku ka poisa wa da ye ka jylla u pynmih na ka Rs. 1,435 klur cha ka Rs. 7,419 klur, hapoh ka JJM da ye u pynpoi um cha 5.33 lak tylli ki manyung, da chna leh 1.37 lak tylli ki yung hapoh ka PMAY(G) heiwa 73% toh kiwa da jan dep chna wei ka thong toh wow chna 1.88 lak tylli.
Kiwa uiñke suwari leh da ku heiwa ha u 2018 da em 12 lak ngut kiwa wan katwa ha u 2024 da tam 16 lak ngut wei daw pynlut leh Rs. 2,896 neibynta kani ka kaam yow ye u pynyoh kreh neibynta ki 59,919 ngut.
Hapoh ka Skills Meghalaya dadep wow e sikai ya 30,000 ngut wei daw e sikai ya 1 lak ngut kat hadooh u snem 2028, kiwa da ye u yoh kreh da em ki 9,500 ngut wei ka thong toh wow yoh kreh 28,251 ngut.
Hapoh ka CM Elevate da em 2,847 ngut kiwa yoh myntoi wei da ye wow pynmih kreh 3,975 tylli hadooh kattæ. Hapoh ka PRIME won da yoh yarap 400 ngut wow seiñ khih heiwa 280 ngut toh kiwa seiñ khih cha palatsor.
Neibynta kiwa tem wa put, kiwa rwai wa siaw, hapoh ka MGMP dadep su ya ki palat Rs. 17.5 klur kiwa da em 3,617 ngut kiwa da lai tem lai rwai la 7,261 sien ha kiwa boon ki thaw wei daw kyrchaan leh sa 43,800 ngut ha ki 3 snem wow wan.
Ya kitu won kiwa ka-it u pynmih ya kiwa boon ki jait ha ki rynsan Social Media kiwa man kam ki Content Creator, lyngba ka Hello Meghalaya da ye wow yarap ya 450 ngut kiwa pynemkaam ya ka ktein Khasi, Garo wa Pnar wei ka sorkar da pynlut ko Rs. 10 klur.
Da pyntip u leh neibynta ki Tech Park wa em hapoh ka jylla, ka sorkar u su ko Rs. 3000 neibynta uwi uwa e kreh ki Company najrong ka tulop wa da su chwa da ka Company wei deiwa leh kamni da em boon ki Company wa kwah wow wai thaw kreh hapoh ka Tech Park wa em ha Shillong.
Discussion about this post