Kam i sdang ya ka yalap pyrchah ya u khñiang kjut HIV/AIDS uwa man u khñiang wa da poor smat bha ha ka imlang sahlang, ynne ka sngi kawa man leh chibynta i leh burom ya ka International Youth Day, ka Mihmyntdu Community Social Welfare Association (TI-CC) Khliehriat chirup i ya krehlang wa ka Meghalaya AIDS Control Society, Shillong da sdang ki ya ka Intensified IEC Campaign dei lai Rally ha Khliehriat wa da chimbynta da ki khynnah skur, kiwa sikai na ki skur waphær waphær ha deilang i rah Placard wa da thoh hajrong u khñiang kjut HIV.
Ya kani ka Rally da pynkut ha Khliehriat West Community Hall wei ha kani ka thaw won da em ka yalang pynsñiawthooh paidbah wa da wan emlang ki sahep sorkar waphær waphær ka District, ki Doctor, ki bru chemphang wa kiwi, heiwa u Saljong R. Marak, MCS Additional Deputy Commissioner da man u kam u kongsan, ka Dr. N.P. Suchiang, DNO, NVHCP East Jaiñtia Hills District kam ka symbood kongsan wei da emlang leh ka Eurekha D. Shira, MCS Assistant Commissioner, East Jaiñtia.
Ka Programme Manager ka MCSWA, ka Rinibeth Patlong khana ko wa nadooh ynne ka sngi neini chakhmat ha ki ar bnai lynter i pynsñiawthooh paidbah u pteiñ i hajrong kammon poor uni u khñiang HIV, kammon u yada wei kamjooh leh i pynsñiawthooh hajrong ka aiñ HIV.
Wei i chim ya kani ka luti toh neidaw wa ku u khñiang kjut HIV ha ka jylla.
U Dr. J. Nongtdu, Medical Officer ka OST Centre Khliehriat Civil Hospital, khana u wa ha East Jaiñtia Hills District uni u khñiang kjut da ku bha u wei da em duna 3,000 ngut ki bru wa im wa uni u khñiang.
Kamtæ kyntu u ya ki paidbah wa chong chnong wow man kiwa syndong wei emkaam leh u tip ya idæ la em hi i mo ya uni u khñiang deiwa phah lai Test neipor cheipor la kammon kammon arsien chi snem khamtam ya kitu kiwa man kiwa em hei maa wow yoh ya uni u khñiang næ kiwa sñiawthooh wa i rukom im yong ki man i iwa ye u yoh ya uni u khñiang.
Ha kani ka sngi da saam khusnaam haroh cha ki khynnah skur wa jop hei thoh Placard.
U kongsan hawa klam ong u, ki khon khynroo khyllood em ki ka bynta wa khroo bha ha kawon kawon ka bynta yong ka imlang sahlang, kamtæ i pynsñiawthooh ya ki khon khynroo khyllood hajrong kani ka phang man iwa biang tam.
Discussion about this post