Ka chnong Lakadong Ummat da em ko hei sah hei doom la duna ar bnai kattu neidaw wa sih u Transformer, da ong ka tyllong khubor na kiwa yahkhmat ka FKJGP Lakadong Ummat Unit.
Neiliang kiwa yahkhmat kani ka Unit, u Leki Hynthong, President wa u Kymmoobha Patwad, General Secretary da lai yachem ki wa u K. Iakai, Assistant Executive Engineer, Khliehriat Distribution Sub Division MePDCL Khliehriat deiwa booh ya ka chithi kyrpaad wow yarap Transformer thymme smat ha kani ka chnong heiwa neiliang u Iakai da ong u wa neiliang yong oo kular u wow chimkhia yeini i dooh Transformer ha ka chnong Lakadong Ummat wei da pyntip u leh cha ki bor wa hajrong yong oo.
Hei yaklam wa uni u sahep yong kani ka chnat da pynsñiaw u wa em i sñiawkhia yong oo leh heiyatoh wa em kiwa pynemkaam bordiñ wa leh stiñ yei kaamram yong ki wow su ya ki bai bordiñ yong ki wa da ktah yei thmu ka chnat wow pynbiang Transformer wut wut manda jai kam ini.
Kamtæ neiliang kiwa yahkhmat ka FKJGP da ong che ki wa i kaamram yong ka chnat toh u pynbiang yei emkaam kiwa pynemkaam bordiñ wei ym toh wa kiwa su tikna u man langkñia lang ki wa ki wym em u su bai bordiñ, wei ini toh i kaamram yong ka chnat bordiñ u leh yeiwa emkaam pyrchah ya kiwa yaleh pyrchah yei pynlai ka chnat lada chem ko yei eh i khoo neidaw wa sah boon kattæ ka bai bordiñ namo ka Outstanding Bill kiwa chong chnong, ong Leki Hynthong.
Yeini i eh kiwa chong chnong, neiliang ka seiñ u booddien ko khlem chong ngiah khnang wa kiwa pynemkaam hok yei bordiñ u yoh ki yei hok yong ki, ong ka khubor wa pynlait da u Kymmoobha Patwad, General Secretary ka Sein FKJGP Lakadong Ummat Unit.
