Jowai: U slap wa da joor uwa da ktah ya ki District ka jylla da pynsangeh u yei rukom im ki bru kamwa man ka sngi neibhah wa da sakhi yei oor khyndaw kamjooh leh i chlai um ha kiwa boon tylli ki District heiwa da dooh leh ya kiwa boon tylli ki mynsien wa kordor.
Hapoh West Jaiñtia Hills District hawa yaklam wa ki sahep ki Block wa kynthup ya u Dr. B. Langbang uwa man kam u BDO ka Laskeiñ, u Dr. D. Lyngdoh uwa man kam u BDO ka Amlarem wa ka B. Blah kawa man kam ka BDO ka Thadlaskeiñ Block da ong ki wa hadooh ynne i janmiet ym em u yoh ya kawon kawon ka yutip wa chah ktah joor ki yung kamjooh leh i chah ktah ki mynsien bru.
Neiliang u Dr. Langbang da ong u wa da em du i tkut donhi u sarok wa pynyabi ya ki ar chnong wa kynthup ya ka Thadialong wa ka Thadbamon kiwa em hapoh ka Block Laskein.
Neiliang kini ki BDO da kyntu ki leh ya kiwa kreh yong ki kam ki Gram Sevak wow man ki kiwa husiar wei kiwa da pynkhreh 24 kynta khnang wow ye u chakri ya ki paidbah lada emkaam yarap jhan ki.
Heijooh i por leh da sakhi yei chlai um ki wah iwa da ktah ya ki hali kamjooh leh i oor khyndaw iwa da wanrah yei thut hei lai i wan wei khamtam da chah ktah joor dooh toh ki mar rep nadooh u kba wa ki jhoor wa rep ki bru.
Kam wow pynkynmoo wa ka West Jaiñtia ini wa dep da man ko kawi naki District wa chah ktah dooh nei chlai um wa na i oor khyndaw.
