Ka Department of Agriculture and Farmers Welfare ka sorkar Meghalaya ha kani ka samoi wa mih u soh khontara uwa da e pyrtuid leh kam u Khasi Mandarin uwa da emlang ya ka GI-Tag, da phah nyngkong 1 MT cha ka Lulu Mall wa em ha Dubai uwa da pynkhreh da ka Jirang Farmer Producer Company (FPC) kawa em ha Ri-Bhoi District.
Ya uni u soh khontara ha kani ka kynti da phah bait lyngba ka Air India Cargo na Guwahati Customs kawa man leh ka sien wa nyngkong wa phah na Guwahati ya uni u soh cha Dubai wei ini da pynsuk ko ya ki warep ka Meghalaya yow pynjan ki cha kiwi ki yaaw ki haat ka pyrthai.
Deiwa leh kamni da pyndooh noh yeiwa emkaam ya ki dalal wei da duna leh i bai kit neibhah da ye wow leh yeini pyn na Guwahati yow poi cha kiwi ki ri.
Ka Jirang FPC toh kawa da seiñ hapoh ka Mission Organic Value Chain Development for North Eastern Region (MOVCFNER) ha u snem 2017 wei da em ko leh hakhmat dooh wow leh ya ini heiwa hei sien nyngkong da ye wow phah cha Dubai ha u snem 2022.
Ha kani ka FPC da em katni da ki kor yow pynlang pynlum wei wow jied ya u soh iwa da pynsuk ya ki warep.
Kiwi de ki thaw wa yoh yarap kamni toh ka Rongmil IVCS wa em ha East Garo Hills wa ka Narwan MPCS wa em ha East Jaiñtia Hills heiwa ki warep da ye ki wow song wei wow pynlang ya chiboon bha u soh deiwa smat yow leh u soh u pyut.
Ha u snem 2022 hawa pyrchang nyngkong da phah 5 MT u soh khontara deilang wa u satroiñ cha ki ri ka Middle East katwa u snem 2023 won da ye wow phah 20 MT.
Discussion about this post