Jowai: Ka yakhun pyrchah ya ka khlam u COVID-19 man ko kawa dang pteiñ katni hapoh ka ri wei ki bru wa yoh ya uni u khñiang dang ku ki kat dang mih ki sngi, wei ki bru wakreh ha ki i chait i khiah hapoh ka ri man ki kiwa em hei maa neibhah wa embynta ki wow sumaar ya kiwa em ya u COVID-19 heiwa wot ka sorkar pyrdi leh da thooh laad ko kammon wow yarap ya ki.
Neiliang u Wyrta da thooh yutip u hajrong i pynkhreh wa i em kini ki tiar yada ya kiwa tip leh kam ki Personal Protection Equipment (PPE) hapoh ki thaw sumaar wa em ha West Jaiñtia Hills.
Hawa yaklam wa ka Superintendent ka Civil Hospital, Ialong ka Dr. R. Pohrmen da pyntip ko wa hapoh kani ka thaw ka Isolation Ward wa em 5 pyllong man ko kawa da pynkhreh.
Chooh chooh heiyatoh wa ki PPE, ka Dr. Pohrmen da pyntip ko wa ya kini ki PPE da yoh 10 tylli (set) na ka yung krehkaam u District Medical & Health Officer ka District, da yoh 12 tylli na ka yung krehkaam Directorate of Health Services ka sorkar jylla, neiliang ka Civil Hopital won da tyrwa thied (Order) ko 100 tylli wei dang yoh du 50 tylli donhi wei kini waroh em 72 tylli donhi ha kani ka thaw sumaar.
Ini man i iwa dang duna bha neibhah wa lada jia wa em bru wa yoh COVID-19 ya kini ki tiar yada emkaam u noh hadien wa sap næ pynemkaam ya ki (Use and Throw).
Ka Dr. Pohrmen da pyntip ko wa lada jia wa em wa kjut, chisien em emkaam 3 ngut ki bru wow sumaar ya uwa kjut wa kynthup ya u Doctor, ka Nurse wa samen wa yang (attendant) wei kini ki 3 ngut emkaam ki wow sap ya kini ki PPE.
Da pyntip ko leh wa katkam wa man dang pyrkhat wa ha ka chi sngi daw kylliang ya kiwa kreh le sien (3 shift) wow em ha kani ka Isolation Ward iwa mut lada jia wa em uwi wa yoh COVID-19 daw emkaam kamwa 9 tylli kini ki PPE ha ka chi sngi.
Ini waroh pynyoo i wa dang duna bha kini ki tiar yada lada jia wa em kiwa chitom wa yoh ya u COVID-19.
Da pyntip ko leh wa lada suba wa em wa yoh ya u COVID-19 daw pyntip cha ka District Surveillance Officer ki wow thooh ya ki Sample wow phah leh ya ki Test.
Katkam wa yoh yutip na ki Doctor ki thaw sumaar hapoh ka District kam ki Community Health Centrer (CHC) wa ki Primary Health Center (PHC) da ong wa ha kini ki thaw sumaar dang yoh ki du 2-3 tylli donhi ki PPE.
Ki thaw sumaar man ki kiwa haphrang dooh wow yakhun pyrchah ya kani ka khlam u COVID-19 wei ka sorkar leh da toh wow pyrkhat ko wow pynbiang ya ki tiar neibynta ki bru ki wakreh ha kini ki thaw.
Discussion about this post