Duna ki tre chnong wa yoh kreh ha Post Office neidaw wa hap tip Hindi hawa yaleh kreh: KSU

Ka Khasi Students’ Union-Employment Monitoring Cell da phah dorkhat ko cha u Montri Rangbah ka jylla, u Conrad Sangma yow pynbait u yei thung kaam thung jaam ha Post Office wa da pynbna da ka North East Meghalaya Postal Circle neibynta ki kreh Gram Dak Sevak (GDS), Asst. Branch Post Master (ABPM) wa Branch Post Master (BPM).

Ka seiñ da ong ko wa katkam ki khubor wa da pynlang ko wei deiwa thooh bniah, da chem wa man-i-por wa jooh lait kreh ha Post Office, boon du ki baar jylla kiwa yoh kaam neidaw ki kyndon yaleh kreh namo ka Selection Criteria toh u tip ki ya ka ktien English wa Hindi wei ini da man ko iwi na ki daw wa eh wei u moochynhut ya ki paidbah yong ka jylla.

Da kdaw leh wa ha kiwi ki jylla ki bru yoh ki wow jied ya ka English waka ktien yong ki tangwa hapoh Meghalaya ym em e laad wow jied da ka Khasi næ Garo iwa da pyndooh laad ya ki wow kreh ki ha ki Post Office.

Hanla ka seiñ da kyntu ko ya ki bor pynlai wa hajrong ini wei u Montri Rangbah leh da thoh u cha u Montri ka Ministry of Communication hajrong ini i bynta yow pynpsiah leh ya ka ktien Khasi wa Garo. Tangwa da chem wa ymem yarap wei ym pu em booh ya ka Khasi wa Garo kam ki ktien wa ye wow thoh Exam wei na kini ki daw boon ki baar jylla kiwa yoh ya kini ki kreh hanla ka Exam ym em man ko kawa eh kawa du katkam ka kyrdan Matric tangwa iwa da eh bha ya ki tre chnong neibhah ym yahaap wow pait du ki Marks Matric khlem da pynchong yurim ya kiwi ki bynta.

Related posts

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Pynbna ka VPP ya ki kyrtong MDC ha ka JHADC wa KHADC

November 13, 2024

Neiliang ka seiñ da ong ko wa ya kini kiwa yoh yei kreh BPM/ABPM/GDS emkaam u tip ki u klam ya ka ktien ki tre chnong wei kini ki kreh toh u lai ki cha ki tre chnong neibhah ini daw yarap ko ya ki paidbah wa wan yei emkaam neidaw wa tip yei ktien u thylliej wei tip ki leh ya ki chnong ki thaw neibhah kiwa wan na baar ymtip ki yeini wei ym ye ki wow pyntyllung yei kaam.

Da ong leh wa em ki jylla ka North East kam ka Assam kawa e laad wow thoh Exam dei ktien Assamese, Bengali wa Bodo wei ha Mizoram dei ktien Mizo wei ha Manipur dei ktien Manipuri wa English.

Kamtæ ka seiñ da dawa ko na u Montri Rangbah wow pynbait u ya ini i kaam wow booh lang ya ka ktien Khasi wa Garo yow e laad ya kiwa chong chnong wow yoh kreh ki ha ki Post office.