Ha ka Result ka Higher Secondary School Leaving Certificate (Science Stream), 2022 kawa da pynbna da ka MBOSE ynne i step, kiwa lait namo kiwa Pass da em ki 71.62% na waroh 2,981 ngut kiwa yaleh ya kani ka Exam iwa duna ya u snem 2021 wa em 75.85% kiwa Pass katwa ha u 2020 da em 72.24%, kiwa Pass.
Kiwa yaleh leh da duna ki ha uni u snem deiwa em hapoh 3000 ngut iwa duna dooh ha ki 5 snem wa da lai heiwa ha u snem 2021 da em ki 3677 ngut, ha u 2020 da em ki 3566 ngut, ha u 2019 da em 3706 ngut katwa ha u 2018 da em 3663 ngut.
Ha uni u snem kiwa boon dooh kiwa yaleh toh na East Khasi Hills 1463 ngut heiwa kiwa Pass da em ki 1102 iwa man 75% katwa kiwa duna dooh toh na South Garo Hills kiwa em 12 ngut heiwa kiwa Pass da em ki 6 ngut iwa mut 50%.
Kiwa Pass na East Khasi Hills leh man ki palat chiteiñ na waroh kiwa Pass iwa dapoi 51.62%, iwa pynbood saka West Garo Hills 15.97% waka West Jaiñtia Hills 13.35% hei wa le.
Na waroh ki 2981 ngut kiwa yaleh, kiwa Pass da em ki 2135 ngut heiwa na kini da em 1828 ngut ki Schedule Tribe (ST) kiwa Pass wa kynthup ya 759 ngut ki chynrang wa 1069 ngut ki kynthai. Ki Schedule Caste kiwa yaleh da em ki 20 ngut, kiwa Pass 19 ngut, ki OBC 44 ngut heiwa kiwa Pass da em ki 40 ngut, ki General Category da em ki 300 ngut kiwa yaleh heiwa ki Pass da em ki 248 ngut.
Ha uni u snem haka Science Stream da yoh nyngkong wei wa ar da ki khynnah ka Laban Bengalee Boys’ Hr. Sec. School, Shillong kitæ u Gyanesh Roy Bhowmik wa u Rishi Sarkat katwa hei wa le da yoh u Chetna Bose naka Don Bosco College, Higher Secondary Section, Tura.
