Ka seiñ Hynniewtrep Integrated Territorial Organization (HITO) West Jaiñtia Hills da lai pait ko ya ka Jowai Civil Hospital Ialong wa ya ka Namdong PHC wei da chem yei boon i duna khamtam kiwa kreh ya ki kor nadooh ki X-Ray, Scanning, Ultra Sound wa kiwi kwi wei hawa yaklam wa u DMHO ka West Jaiñtia Hills District da pyntip u wa ha ka jylla dang duna bha kiwa pyndep yei puræ kam ki Laboratory Technician wei ini da pynman ya ki thaw sumaar wow tkoh i krehkaam kam ha wow leh ya ki Test wa boonjait heiwa da hap wow lai leh chawi.
Heiyatoh won wa i wym biang dawai ki Sub-Centre, PHC, CHC wei da em du ki kattu katni kiwa ye u pynbiang yeini, neiliang u DMHO da jubab u wa hei yongsakhiat em boon ki dawai tangwa lada ki Doctor wa pait ya kini ki PHC,CHC ym paan dawai ki, kammon u tip wow pynbiang ya ki.
Ka seiñ da pynsñiaw ko leh ha u DMHO yei pynslem wai ya ka Maternity & Child Hospital wa em ha Panaliar Jowai heiwa u DMHO da ong u wa ka sorkar da dep ko u pynbna ya ki kreh neibynta kani ka Hospital tangwa ki Doctor won dang duna ki wei hajrong kani ka yurim i wai ya katai ka Hospital da slem i.
Ka seiñ da lai pait ko leh ya ka Namdong PHC wei da chem wa em du kawi ka Doctor Ayush wa 6 ngut ki Nurse iwa da pynlyngoh ya ka seiñ neibhah kani ka PHC toh kawa daw pynku kyrdan noh cha ka CHC wei da em ko chiboon i duna wei da yoo lakam wa pynbiej Election neibhah da jan ka Election.
Ka seiñ da ong ko wa ka sorkar toh u chimkhia ko ya ini yow pynjanai ya ki thaw sumaar khnang wa ki paidbah ki wym kotbor wow lai cha ki Hospital ki bru samen u yoh yarap ki.
