Jowai: Ka Saiñdur, Tipkur Tipkha, Ieng, Ehrngiew, Khun Hynñiewtrep (STIEH) ynne ka sngi da pynman ko ya ka yalang paidbah ha Yungwalieh ka Tpep Pale, Jowai hajrong wow paan i kyrchaan ya ka Khasi Social Custom of Lineage (2nd Amendment Bill) 2018 yong ka KHADC wei wow chna noh ya ka jooh ka Bill ha JHADC.
Ka yalang paidbah da man ko kawa duna i wan ki paidbah cha ka wei hadien ini da pynman noh da ka yaphyllu yumut hapyrdi ki wa wan.
Ha kani ka sngi da wan kiwa kitkaam kam na ka seiñ KSU, KJNU, JNC wa kiwi kiwi ki bru samen.
Ya ka yalang da pynlai da ka President ka STIEH ka Deiwi Tongper hei emlang kiwi ki dkhot ka seiñ, kamjooh u muktiar u EK Sutnga uwa da batai chaphang kani ka aiñ kamjooh leh i myntoi wow pynman aiñ ya ka wei wow wanrah kam kani ka jooh ka Bill ha JHADC.
Kiwa klam ha kani ka yalang da kyntu ki wa emkaam wow pynman biang ya kani ka yalang ha kiwi tawon ki bynta ka ri-loom Jaiñtia wei wow pynman ya ka ha ki sngi yaaw.
Da pynsñiaw ki leh yei mynsien wa sñiawsih wow yoo wa duna kiwa wan mih cha kani ka yalang.
Neiliang ka Deiwi Tongper da pynche ko wa i daw wa duna kiwa wan cha kani ka yalang toh yoosar wa da kyndian ware i por wei ye leh u man da kiwi tawon ki daw kiwa ymye u kiar.
Ha kani ka sngi da em leh ka Signature Campaign wow pynyoo wa kyrchaan ya ka aiñ chongkha yong ka KHADC.
Discussion about this post