Jowai : Ka yalang paidbah kawa da pynman ynne ka sngi da ki seiñbhalang na Ri Loom Jaiñtia da man ko kawa lai bait khlem iwon iwon i ya awri awra. Heiwa da wan chim bynta da ki dkot ki seiñbhalang, ki waheh chnong, ki manbei man pa, wa ki khynnah puræ ka Kiang Nangbah Government College.
Ha kani ka yalang da u President ka JYF, u ma Poipynhun Majaw da man u kam u chongknor. Da yoh yei klam na kiwa boon ki nonyalam seiñbhalang ki manbei wa ki bru paidbah. Da em leh kiwa da rah ya ki placard næ ki kot rben heiwa da thoh ya ki kyntien wa beiñ ya ka sorkar kamjooh leh iwa kyntu ya ki bor sorkar kiwa ha khlieh.
Uwi u khynroo wa puræ ha Kiang Nangbah Government College, u Refill Sari da e klam u heiwa da batai u yei eh i khoo wa yachem ki khynnah ha kani ka thaw puræ. Da khana u leh yeiwa da lai luti ki deiwa jaijai nadooh wa sdang ki u dawa yei hok yong ki wei duna iwa em ha kani ka thaw puræ. “Da jooh ong o ya ka Principal yow rah i da ki mura yow chong hapoh class neidaw wa da khynnia wei wym em ben wow chong” da ong u khynroo Refill.
Nalor uni u khynroo da yoh yei klam na kawi ka manbei ka kong Robila Mylliemngap kawa da pynsniaw yei sniawsih wa da chah dat chah bom kini ki khynnah ha ka 10 tarik iwa da pynmynsoo leh ya ki. Heijooh i por leh da ong ko wa lada ka Ri Loom Garo man ko kawa sahdien kawa duna hajrong wa em ko ya ki Kolej wa ki thaw sumar wa biang tæ lada kamtæ yi wa sahdien ka Ri Loom Jaintia namo ka Ri Loom Garo? Da kyntu ko leh ya ki 7 ngut ki MLA wow chimkhia ki yei roi i par ka Jaintia.
Uwi u waheh na Jowai u ma KF Laloo hei klam yong oo da pynkynmoo u yeiwa dang nachwa da tip ya kani ka kolej kam ka Jowai Government College wei hadien nawon da pynkylla ya ka chei pyrtuid wada tip ya ka katni. Chooh chooh da kyntu u leh ya u Dy. CM ka jylla u Dr. RC Laloo uwa da jooh man leh kam u Secretary ka Student Union heitæ por weiwa puræ u ha kani ka kolej wow chimkhia u wei wow pynkrehkaam yei dawa kini ki khynnah puræ neibynta i bha i miat ka mynried mankawi.
Kiwi kiwa da klam da pynap pynsniaw ki wei da beiñ ki leh yei leh embor ki bor ka District wa ki bor pulit ya ki khynnah puræ ka Kiang Nangbah Government College heipor wa lai piadbah ki iwa man leh iwa jaijai yow dawa yei hok yong ki. Heijooh i por da dawa ki watoh wa u transfer noh bran bran ya u DC, u Addl. SP wa kiwi kiwi kiwa emkti na kani ka District. Weiwa da kyntu ki leh ya ki paidbah wym hoi u man ki kiwa chong kli kti hieh wei wow wan ki chaphrang ha kam kini ki kaam neibynta ka mynried yong ka ri wa ka jaidbru.
U President ka Synjuk Rangbah Chnong Amlarem u ma Kolmen Pohshna da pynsniaw u yeiwa yachem u wa u DC heiwa da ong u wa uni u DC man u u bru uwa leh embor bha ha kiwon kiwon ki yalang wa em u.
U President ka JSU u ma Rikut Parien hei yatoh wa i duna i wan ki paidbah da ong u wa neiliang ki seiñbhalang da rai wow pynduna yei wan ki dkhot yong ki toh neidaw wa yooluti ki wa daw wan ki paidbah. Da ong u leh wa da toh i por wow dam u ood pohdoh u ood u khñium cha internet kam ha facebook wa kiwi kiwi, da kyntu u aa da toh i por wow yieñ yaleh noh i.
Da pynkut ya kani ka yalang heiwa da yoh ya ki kyntien khublei na u President ka RJYF u RK Rymbai.
Weiwa ha kani ka yalang da chim leh yei rai wow e por ya ka sorkar 7 sngi wow leh yeiwa emkaam lym kamtæ daw rai yakhih noh ki yow yoh yeiwa da dawa ki.
Discussion about this post