Ka seiñ Jaiñtia Students’ Movement, Eastern Region hadien wa ki warep kba yong ka thaaiñ da pynsñiaw ki chiboon i eh yong ki nei duna i sboh chyieñ wa ka yusong kba wa dai chiteiñ dor (Subsidy) wa yoh na ka chnat Agriculture khamtam ha kam ini i por yong ka khlam wa da maad yei chitom wow thied hei dor wa syad na ki dukan ki bru samen, wei heijooh i por da poi ka aiom wow thung kba.
Kamtæ neiliang ka seiñ da lai yachem ki ya ka District Agriculture Officer, Khliehriat ka W. Challam kawa da pynsñiaw wa ha uni u snem neidaw wa duna poisa ka sorkar, ym ye wow pynbiang katkam i emkaam yong ki.
Ka seiñ da ong ko wa ini da man i iwa sñiawsih ya ki warep wa pli wa da chem ki ya kam ini i eh heiwa ka sorkar nei por cha i por da jooh pynchlur ko ya ki warep, ki khon khynroo khyllood wow kyruiñ khmat ki cha ki kaam rep yow ye u yieñ ha ki kjat yong ki hi, neibhah kamwa da tip wa i kaam rep toh u budloom yong i yoh i kot, wei lada ha ini i rukom iyi em yumut hawa ka sorkar ym em ye ko wow pynbiang.
Kamtæ neiliang ka seiñ da kyrpaad ko ya ka sorkar khamtam ya u montri wa pait ya ka chnat rep, u Banteidor Lyngdoh wa toh u pait u yow pynyoh ya i sboh hapoh uni u bnai chwa wa ki warep u sdang ki wow thung u tep ha bnai wa daw wan. Lym kamtæ ka seiñ daw chim ko da iwi won i luti wow lai.
