E baam ya ki ksaw wa khlem tre ha yung mi, ong ka SC ya uwa yaleh mukotduma

Ka Supreme Court da pynsñiaw ko yei sñiaw-iñ hawa chong bichaar ya kawi ka mukotduma wa yaleh da uwi u bru uwa da ong wa joor chah pyndik u heipor wa lai e baam u ya ki ksaw wa khlem tre (Stray Dogs) deiwa kylli ya uni u bru uwa na Noida, “Ileh ym e baam mi ki ha yung mi?”.

Ya kani ka mukotduma da chong bichaar ha ka 15 tarik da u Justice Vikram Nath wa u Sandeep Metha kiwa da kylli ya u muktiar uwa yaleh mukotduma wa lada hap wow e yei thaw paidbah neibynta kini ki mrad hadooh wym yoh thaw de neibynta ki bru deiwa pynrap wa ileh ym e baam ya kini ki ksaw ha ki yung ki sem kini ki bru, ym em wa khang wow leh ki yeini.

ADVERTISEMENT

Da e buit leh ya uwa leh mukotduma wow wai dei thaw sah ya kini ki ksaw ha yung u.

Uni uwa leh mukotduma da ong u wa ki Municipal wa em ha Greater Noida da e thaw ki neibynta ki ksaw katwa ha Noida won ym em.

Related posts

Da wai ya ki ar tylli ki Grassroot Football Centre wa thymme ha West Jaiñtia Hills

July 17, 2025

Kammon heh ka Rs. 5 lak ya ka Rs. 11.5 lak? Kylli ka HITO na ka JHADC

July 17, 2025

Kani ka mukotduma da lai rah cha ka Supreme Court hadien wa pynmih hukum ka Allahabad High Court ha ka 25-03-25 heiwa kiwa maya ksaw da ong ki wa da chah pyndik ki deiwa khang ya ki wow e baam ya ki ksaw wa khlem tre wa em ha Noida wei ha ka mukotduma da ong wa kani man ko pyrchah ya ka Animal Birth Control Rules.

Ka Rule 20 kani ka Animal Birth Control Rules da klam ko chaphang i e baam ya ki mrad wa em hapoh ka chnong tangwa da pynkitkhlieh ya kiwa chong chnong lyngba ki Resident Welfare Association (RWA) næ ha ki Apartment Owners Association (AOA).

Kini ki RWA wa ki AOA toh u pynbait ki dei thaw wow e baam ya ki ksaw wei wow leh yeini deiwa pynbait yei por khlem da chah ktah ki tymmen wa ki khynnah.

Neiliang kiwa bichaar ka Supreme Court da phah ki ya uni uwa yaleh mukotduma wow pyrchang u lai yah Cycle dei step næ wow lai phet step yow yoo u kammon jia.

Ini i e baam ya ki ksaw wa khlem tre toh iwa da wanrah i yania wa joor bha ha kini ki slem wa da lai ha India khamtam hadien wa kini ki ksaw da em wa dait ki ya ki khynnah hadooh wa em leh kiwa da yap.

Hachwa ini, ka Allahabad High Court hawa pynmih hukum da ong ko wa emkaam wow pyrkhat leh ya ki bru kiwa lai wa wan wym chah ktah ki deiwa e baam ya kini ki ksaw wa khlem tre. Kamtæ da phah ya ki bor sorkar wow pynyoo ki yei sñiawthooh hawa pait yeini deiwa leh katkam ka aiñ Prevention of Cruelty to Animals Act, 1960.